ട്രാവൽ ഏജൻസിയുടെ പേരിൽ ലക്ഷങ്ങളുടെ തട്ടിപ്പ്: കാൽഗറിയിൽ ദമ്പതികൾ പിടിയിൽ

ട്രാവൽ ഏജൻ്റ് എന്ന വ്യാജേന വിനോദസഞ്ചാരികളെ പറ്റിച്ച് ഏകദേശം രണ്ട് ലക്ഷം ഡോളറിലധികം  തട്ടിയെടുത്ത കേസിൽ കാൽഗറിയിൽ നിന്നുള്ള ദമ്പതികളെ പോലീസ് അറസ്റ്റ് ചെയ്തു. 'I.N TravelPh' എന്ന പേരിൽ പ്രവർത്തിച്ചിരുന്ന ഏജൻസി വഴി വിമാന ടിക്കറ്റുകളും അവധിക്കാല പാക്കേജുകളും ബുക്ക് ചെയ്യാമെന്ന് വാഗ്ദാനം ചെയ്താണ് ഇവർ തട്ടിപ്പ് നടത്തിയത്. ഇ-ട്രാൻസ്ഫർ വഴി പണം കൈപ്പറ്റിയ ശേഷം ബുക്കിംഗ് സ്ഥിരീകരണമോ ടിക്കറ്റുകളോ നൽകാതെ ഉപഭോക്താക്കളെ വഞ്ചിക്കുകയായിരുന്നു ഇവരുടെ രീതി. കാനഡയിൽ നിന്നും ഫിലിപ്പീൻസിൽ നിന്നുമുള്ള നിരവധി ആളുകൾ ഈ തട്ടിപ്പിന് ഇരയായിട്ടുണ്ടെന്ന് അന്വേഷണത്തിൽ വ്യക്തമായി.

തട്ടിപ്പിലൂടെ ലഭിക്കുന്ന പണം വെളുപ്പിക്കുന്നതിനായി ഭർത്താവിൻ്റെ ബാങ്ക് അക്കൗണ്ട് ഉപയോഗിച്ചതായാണ് പോലീസ് കണ്ടെത്തൽ. സംഭവവുമായി ബന്ധപ്പെട്ട് 33 വയസ്സുകാരിയായ ജമൈക്ക സാൽവഡോർ, 30 വയസ്സുകാരനായ എഡ്രെൻസ് ലക്കാബ എന്നിവർക്കെതിരെ വഞ്ചന, വ്യാജരേഖ ചമയ്ക്കൽ, പണം വെളുപ്പിക്കൽ തുടങ്ങിയ കുറ്റങ്ങൾ ചുമത്തിയിട്ടുണ്ട്. കഴിഞ്ഞ മാസം ബെൽവെഡെറെയിലെ ഇവരുടെ വസതിയിൽ നടത്തിയ പരിശോധനയിൽ ലാപ്ടോപ്പുകളും ഐപാഡുകളും ഉൾപ്പെടെയുള്ള നിർണ്ണായക തെളിവുകൾ പോലീസ് പിടിച്ചെടുത്തു. പ്രതികളെ ഏപ്രിൽ മാസത്തിൽ കോടതിയിൽ ഹാജരാക്കും. കൂടുതൽ പേർ തട്ടിപ്പിന് ഇരയായിട്ടുണ്ടോ എന്ന് പോലീസ് പരിശോധിച്ചു വരികയാണ്.