പ്രതിഷേധത്തിനിടെ വിദ്യാര്ത്ഥികള് അറസ്റ്റില്; സ്കൂള് ഫണ്ട് നിര്ത്തലാക്കുമെന്ന് ഗവര്ണര് അബ്ബോട്ടിന്റെ ഭീഷണി
By: 600002 On: Feb 4, 2026, 7:00 AM
പി പി ചെറിയാന്
ടെക്സാസ്: ടെക്സസിലെ കൈലില് നടന്ന ഐസ് വിരുദ്ധ പ്രതിഷേധത്തിനിടെ രണ്ട് വിദ്യാര്ത്ഥികളെ അറസ്റ്റ് ചെയ്ത നടപടിയെ അനുകൂലിച്ച് ഗവര്ണര് ഗ്രെഗ് അബ്ബോട്ട്. പഠനം തടസ്സപ്പെടുത്തിയുള്ള ഇത്തരം പ്രതിഷേധങ്ങള്ക്ക് അനുമതി നല്കുന്ന സ്കൂളുകളുടെ ഫണ്ട് വെട്ടിക്കുറയ്ക്കുമെന്നും അദ്ദേഹം മുന്നറിയിപ്പ് നല്കി.
പ്രതിഷേധത്തിനിടെ മദ്യപിച്ചതിനും ഉദ്യോഗസ്ഥരെ ആക്രമിച്ചതിനും തടസ്സം നിന്നതിനുമാണ് രണ്ട് പ്രായപൂര്ത്തിയാകാത്ത വിദ്യാര്ത്ഥികളെ പോലീസ് അറസ്റ്റ് ചെയ്തത്.
'കുറ്റകൃത്യം ചെയ്യുന്നത് ആരായാലും ശിക്ഷിക്കപ്പെടണം' എന്ന് അബ്ബോട്ട് എക്സില് കുറിച്ചു. ഇത്തരം പ്രതിഷേധങ്ങള് അരാജകത്വത്തിന് കാരണമാകുന്നുവെന്നും ഇതിന് കൂട്ടുനില്ക്കുന്ന സ്കൂള് അധികൃതര്ക്കെതിരെയും നടപടി വേണമെന്നും അദ്ദേഹം ആവശ്യപ്പെട്ടു.
നിയമപരമായ പാഠ്യപദ്ധതി പഠിപ്പിക്കാതെ വിദ്യാര്ത്ഥികളെ പ്രതിഷേധിക്കാന് വിടുന്ന സ്കൂളുകളുടെ സര്ക്കാര് ധനസഹായം നിര്ത്തലാക്കുന്നത് ആലോചനയിലാണെന്ന് അദ്ദേഹം വ്യക്തമാക്കി.
മിനിയാപൊളിസിലെ ഐസ് വെടിവെപ്പുമായി ബന്ധപ്പെട്ട് ടെക്സസിലെ വിവിധ വിദ്യാലയങ്ങളില് പ്രതിഷേധം ശക്തമാകുന്ന സാഹചര്യത്തിലാണ് ഗവര്ണറുടെ ഈ കര്ശന നിലപാട്.