കാൽഗറിയിൽ ഭീഷണിപ്പെടുത്തി പണം തട്ടുന്നതും വെടിവെപ്പും ഉൾപ്പെടെയുള്ള കുറ്റകൃത്യങ്ങൾ വർദ്ധിച്ചതായി റിപ്പോർട്ട്

കാൽഗറിയിൽ ഭീഷണിപ്പെടുത്തി പണം തട്ടുന്നതും വെടിവെപ്പും ഉൾപ്പെടെയുള്ള കുറ്റകൃത്യങ്ങൾ വർദ്ധിച്ചതായി റിപ്പോർട്ട്. ദക്ഷിണേഷ്യൻ സമൂഹത്തിലുള്ളവരെയാണ് ഗുണ്ടാസംഘങ്ങൾ പ്രധാനമായും ലക്ഷ്യമിടുന്നതെന്നും പോലീസ് പറയുന്നു. 2025 ജൂലൈ മുതൽ 13 പണം തട്ടൽ കേസുകളും 11 വെടിവെപ്പുകളും റിപ്പോർട്ട് ചെയ്യപ്പെട്ടിട്ടുണ്ട്. ഏറ്റവും പുതിയ സംഭവങ്ങൾ ഉണ്ടായത് ടാരാഡേൽ, റെഡ്‌സ്റ്റോൺ എന്നീ പ്രദേശങ്ങളിലാണ്. റെഡ്‌സ്റ്റോണിൽ ഒരു വീടിന് നേരെ വെടിയുണ്ടകൾ പതിച്ചെങ്കിലും ആർക്കും പരിക്കേറ്റില്ല.

സുരക്ഷയ്ക്കായി പണം നൽകണമെന്ന് ഭീഷണിപ്പെടുത്തിയാണ് ഇരകളെ ഇവർ വലയിലാക്കുന്നത്. പല ബിസിനസ് സ്ഥാപനങ്ങളും ഭയം കാരണം ഇത്തരം കുറ്റകൃത്യങ്ങൾ റിപ്പോർട്ട് ചെയ്യാൻ മടിക്കുന്നു.ഈ പ്രശ്നം ചർച്ച ചെയ്യാനായി കാനഡയിലുടനീളമുള്ള പോലീസ് മേധാവികൾ യോഗം ചേരാനിരിക്കുകയാണ്. വിവരങ്ങൾ കൈമാറുന്നതിനായി കാൽഗറി പോലീസ് ആർ.സി.എം.പിയുമായും (RCMP) ബോർഡർ സർവീസുമായും ചേർന്ന് പ്രവർത്തിക്കുന്നുണ്ട്. സർക്കാർ വേഗത്തിൽ നടപടിയെടുക്കണമെന്ന് കമ്മ്യൂണിറ്റി നേതാക്കളും ആവശ്യപ്പെട്ടു. തങ്ങൾക്ക് സുരക്ഷിതത്വമില്ലെന്നും ഗുണ്ടാസംഘങ്ങൾക്കെതിരെ ശക്തമായ നിയമങ്ങൾ വേണമെന്നും താമസക്കാർ ആവശ്യപ്പെട്ടു. അന്വേഷണം തുടരുമെന്നും ജനങ്ങളുടെ സുരക്ഷ ഉറപ്പാക്കുമെന്നും പോലീസ് വ്യക്തമാക്കി.