കാൽഗറിയിൽ നിർമ്മാണ മേഖല കേന്ദ്രീകരിച്ച് മോഷണം വർദ്ധിക്കുന്നു; ജാഗ്രതാ നിർദ്ദേശവുമായി പോലീസ്

 

നഗരത്തിലെ വികസ്വര മേഖലകളിലെ നിർമ്മാണ സ്ഥലങ്ങൾ കേന്ദ്രീകരിച്ച് നടക്കുന്ന വ്യാപകമായ മോഷണങ്ങളിൽ കാൽഗറി പോലീസ് സർവീസ് കടുത്ത ആശങ്ക രേഖപ്പെടുത്തി. നിർമ്മാണത്തിലിരിക്കുന്ന കെട്ടിടങ്ങളിൽ നിന്ന് തടി, House wraps, വിലപിടിപ്പുള്ള കോപ്പർ വയറുകൾ, ഗാർഹിക ഉപകരണങ്ങൾ എന്നിവ മോഷ്ടിക്കപ്പെടുന്ന പ്രവണത കഴിഞ്ഞ രണ്ട് വർഷത്തിനിടെ ഗണ്യമായി വർദ്ധിച്ചതായാണ് റിപ്പോർട്ട്.

മോഷണം തടയുന്നതിനായി ആപ്പിൾ എയർടാഗുകൾ (Apple AirTags) പോലുള്ള അത്യാധുനിക ട്രാക്കിംഗ് സംവിധാനങ്ങൾ ഉപയോഗിക്കാൻ നിർമ്മാണ കമ്പനികൾ നിർബന്ധിതരായിരിക്കുകയാണ്. രാത്രികാല സുരക്ഷാ ഉദ്യോഗസ്ഥരെ വിന്യസിക്കുന്നുണ്ടെങ്കിലും, വ്യാപിച്ചുകിടക്കുന്ന നിർമ്മാണ സൈറ്റുകളിൽ പൂർണ്ണമായ നിരീക്ഷണം ഉറപ്പാക്കുക എന്നത് വലിയ വെല്ലുവിളിയാണെന്ന് ഈ രംഗത്തെ വിദഗ്ധർ ചൂണ്ടിക്കാട്ടുന്നു.

നിർമ്മാണ മേഖലയിലുണ്ടാകുന്ന ഈ സുരക്ഷാ വീഴ്ചകൾ ഉപഭോക്താക്കൾക്ക് വലിയ സാമ്പത്തിക ബാധ്യതയാണ് സൃഷ്ടിക്കുന്നത്. മോഷണം മൂലമുണ്ടാകുന്ന നഷ്ടം നികത്തുന്നതിനായി നിർമ്മാണ ചിലവിൽ മൂന്ന് മുതൽ അഞ്ച് ശതമാനം വരെ അധിക തുക കണ്ടിൻജൻസി ഫണ്ടായി ഉൾപ്പെടുത്തേണ്ടി വരുന്നത് വീട് വാങ്ങുന്നവർക്ക് തിരിച്ചടിയാകുന്നു. സാമഗ്രികൾ നഷ്ടപ്പെടുന്നതിലൂടെയുണ്ടാകുന്ന സാമ്പത്തിക നഷ്ടത്തിന് പുറമെ, പണികൾ പുനരാരംഭിക്കേണ്ടി വരുന്നത് പദ്ധതികൾ പൂർത്തിയാക്കാൻ കാലതാമസമുണ്ടാക്കുന്നു. നഗരത്തിൻ്റെ വികസനത്തിനൊപ്പം വർദ്ധിച്ചുവരുന്ന മോഷണങ്ങൾ തടയുന്നതിനായി പൊതുജനങ്ങൾ ജാഗ്രത പാലിക്കണമെന്നും അസ്വാഭാവികമായ നീക്കങ്ങൾ ശ്രദ്ധയിൽപ്പെട്ടാൽ ഉടനടി അധികൃതരെ വിവരം അറിയിക്കണമെന്നും കാൽഗറി പോലീസ്  അഭ്യർത്ഥിച്ചു.