കാനഡയുടെ പുതിയ ഗ്രോസസറി റിബേറ്റ് പദ്ധതിക്ക് 12.4 ബില്യൺ ഡോളർ ചിലവ് വരുമെന്ന് റിപ്പോർട്ട്

കാനഡയിലെ വർദ്ധിച്ചുവരുന്ന ജീവിതച്ചെലവ് നിയന്ത്രിക്കുന്നതിൻ്റെ ഭാഗമായി പ്രധാനമന്ത്രി മാർക്ക് കാർണി പ്രഖ്യാപിച്ച 'കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റ്'  പദ്ധതിക്ക് അടുത്ത അഞ്ച് വർഷത്തിനുള്ളിൽ 12.4 ബില്യൺ ഡോളർ ചിലവ് വരുമെന്ന് പാർലമെൻ്ററി ബജറ്റ് ഓഫീസർ (PBO) കണക്കാക്കുന്നു. 2020 മുതൽ രാജ്യത്തെ ഭക്ഷ്യവിലയിൽ 30 ശതമാനത്തിലധികം വർദ്ധനവ് രേഖപ്പെടുത്തിയ സാഹചര്യത്തിലാണ് താഴ്ന്ന വരുമാനക്കാരായ കുടുംബങ്ങളെ സഹായിക്കാൻ സർക്കാർ ഈ ധനസഹായ പദ്ധതി ആവിഷ്കരിച്ചത്. ജിഎസ്ടി ക്രെഡിറ്റിലെ വർദ്ധനവും ഒറ്റത്തവണ ലഭിക്കുന്ന പേയ്‌മെൻ്റും ഉൾപ്പെടുന്നതാണ് ഈ പദ്ധതിയെന്ന് പിബിഒയുടെ പുതിയ റിപ്പോർട്ട് വ്യക്തമാക്കുന്നു.

ഈ സാമ്പത്തിക വർഷം മാത്രം ഒറ്റത്തവണ പേയ്‌മെൻ്റുകൾക്കായി മൂന്ന് ബില്യൺ ഡോളറിലധികം ചിലവാകുമെന്ന് റിപ്പോർട്ട് സൂചിപ്പിക്കുന്നു. തുടർന്നുള്ള വർഷങ്ങളിൽ 2031 വരെ പ്രതിവർഷം 1.7 ബില്യൺ മുതൽ 1.9 ബില്യൺ ഡോളർ വരെയാണ് പ്രതീക്ഷിക്കുന്ന ചിലവ്. പദ്ധതിയുടെ ഒന്നാം വർഷത്തിൽ, നാലംഗ കുടുംബങ്ങൾക്ക് ലഭിക്കുന്ന വാർഷിക ജിഎസ്ടി റിബേറ്റ് 1,100 ഡോളറിൽ നിന്ന് 1,890 ഡോളറായും, വ്യക്തിഗത റിബേറ്റ് 540 ഡോളറിൽ നിന്ന് 950 ഡോളറായും വർദ്ധിക്കും. കനേഡിയൻ കുടുംബങ്ങളുടെ സാമ്പത്തിക ഭാരം ലഘൂകരിക്കാൻ ലക്ഷ്യമിട്ടുള്ള ഈ പദ്ധതി വരും വർഷങ്ങളിൽ വലിയ സ്വാധീനം ചെലുത്തുമെന്നാണ് വിലയിരുത്തപ്പെടുന്നത്.