കാൽഗറി പൊലീസ് സേനയിൽ ഉദ്യോഗസ്ഥ ക്ഷാമം രൂക്ഷം; 660 പുതിയ നിയമനങ്ങൾക്ക് ശുപാർശ

 

കാനഡയിലെ മൂന്നാമത്തെ വലിയ മുനിസിപ്പൽ പൊലീസ് സേനയായ കാൽഗറി പൊലീസ് സർവീസ്  കടുത്ത ഭരണപരമായ വെല്ലുവിളികൾ നേരിടുന്നതായി ചീഫ് കോൺസ്റ്റബിൾ കേറ്റി മക് ലെല്ലൻ വെളിപ്പെടുത്തി. നിലവിൽ 3,200 ഓളം ജീവനക്കാരുള്ള സേനയിൽ ഫ്രണ്ട്-ലൈൻ ഓഫീസർമാരുടെ കുറവ് ദൈനംദിന സുരക്ഷാ പ്രവർത്തനങ്ങളെ ബാധിക്കുന്ന സാഹചര്യമാണുള്ളത്. ഇത് പരിഹരിക്കുന്നതിനായി അടുത്ത നാല് വർഷത്തിനുള്ളിൽ 660 പുതിയ ഓഫീസർമാരെ നിയമിക്കാനുള്ള സമഗ്ര പദ്ധതി സിറ്റി കൗൺസിലിന് സമർപ്പിക്കുമെന്ന് ചീഫ് അറിയിച്ചു.

നിലവിലെ ഉദ്യോഗസ്ഥരിൽ ഗണ്യമായൊരു വിഭാഗം മെഡിക്കൽ അവധിയിലും മറ്റ് അഡ്മിനിസ്‌ട്രേറ്റീവ് ഡ്യൂട്ടികളിലുമാണെന്നത് സേനയുടെ പ്രവർത്തനക്ഷമതയെ പരിമിതപ്പെടുത്തുന്നുണ്ട്. കുറ്റകൃത്യങ്ങളുടെ വർദ്ധിച്ചുവരുന്ന സങ്കീർണ്ണതയും മയക്കുമരുന്ന്-ആയുധ ഇടപാടുകളിലെ വർദ്ധനവും പുതിയ ഓഫീസർമാർക്ക് വലിയ വെല്ലുവിളിയാണ് ഉയർത്തുന്നത്. യുവാക്കൾക്കിടയിലെ കുറ്റകൃത്യങ്ങൾ തടയുന്നതിനും സാമൂഹിക പങ്കാളിത്തം ഉറപ്പാക്കുന്നതിനും കൂടുതൽ ഉദ്യോഗസ്ഥരുടെ സേവനം അനിവാര്യമാണെന്ന് അധികൃതർ ചൂണ്ടിക്കാട്ടുന്നു.

റിക്രൂട്ട്‌മെൻ്റ് നടപടികൾ ലഘൂകരിക്കുന്നതിൻ്റെ ഭാഗമായി ഓൺലൈൻ പരീക്ഷകളും നൂതന വോയിസ് ടെസ്റ്റുകളും ഏർപ്പെടുത്തിയിട്ടുണ്ട്. സേനയിൽ സ്ത്രീകളുടെയും ന്യൂനപക്ഷ വിഭാഗങ്ങളുടെയും പ്രാതിനിധ്യം വർദ്ധിപ്പിക്കേണ്ടത് കാലഘട്ടത്തിൻ്റെ ആവശ്യമാണെന്നും മൗണ്ട് റോയൽ സർവകലാശാലയിലെ വിദഗ്ധർ പറയുന്നു.