മിനസോട്ടയിലെ റെയ്ഡുകളെക്കുറിച്ച് പ്രതികരിക്കാതെ കനേഡിയൻ മന്ത്രി ഗാരി ആനന്ദസംഗരി

അമേരിക്കയിലെ മിനസോട്ടയിൽ രണ്ട് പേരുടെ മരണത്തിനിടയാക്കിയ കുടിയേറ്റ റെയ്ഡുകളെക്കുറിച്ച് പ്രതികരിക്കാൻ വിസമ്മതിച്ച് കാനഡയുടെ പബ്ലിക് സേഫ്റ്റി മന്ത്രി ഗാരി ആനന്ദസംഗരി. കാനഡയിലെ കുടിയേറ്റ നടപടികൾ നിയമപരവും മാനുഷികവുമാണെന്ന് അദ്ദേഹം വ്യക്തമാക്കി. "കാനഡ മിനസോട്ടയല്ല" എന്ന് പറഞ്ഞ അദ്ദേഹം, ഓരോ കേസിലും കൃത്യമായ നിയമനടപടികൾ പാലിക്കുമെന്ന് ഉറപ്പുനൽകി.

അമേരിക്കയുടെ നടപടികളെക്കുറിച്ച് നേരിട്ട് പ്രതികരിക്കാൻ മന്ത്രി തയ്യാറായില്ല.കഴിഞ്ഞ വർഷം 22,000-ത്തിലധികം ആളുകളെ നിയമപരമായ നടപടിക്രമങ്ങൾ പാലിച്ചുകൊണ്ട് കാനഡ നാടുകടത്തിയതായി അദ്ദേഹം ചൂണ്ടിക്കാട്ടി.കാനഡയുടെ കുടിയേറ്റ സംവിധാനം ചാർട്ടർ ഓഫ് റൈറ്റ്‌സും നിയമവാഴ്ചയും പിന്തുടരുന്നുണ്ടെന്ന് ആനന്ദസംഗരി പറഞ്ഞു. അമേരിക്കൻ ഏജൻസികളുമായുള്ള സഹകരണം തുടരുമെന്നും അദ്ദേഹം കൂട്ടിച്ചേർത്തു. 

മിനസോട്ടയിലെ റെയ്ഡുകളിൽ മാനിറ്റോബ പ്രീമിയർ വാബ് കിന്യൂ ആശങ്ക രേഖപ്പെടുത്തി. മിനസോട്ടയിൽ ബന്ധുക്കളുള്ള മാനിറ്റോബ നിവാസികൾ അസ്വസ്ഥരാണെന്ന് അദ്ദേഹം പറഞ്ഞു. വിദേശരാജ്യങ്ങളിലെ നടപടികൾ കാനഡയുടെ മൂല്യങ്ങൾക്ക് വിരുദ്ധമാകുമ്പോൾ രാജ്യം പ്രതികരിക്കണമെന്ന് കിന്യൂ ആവശ്യപ്പെട്ടു. അമേരിക്കയുമായുള്ള വ്യാപാര-സുരക്ഷാ ബന്ധങ്ങൾ സംരക്ഷിക്കുന്നതോടൊപ്പം തന്നെ കാനഡ ധാർമ്മികമായി വ്യക്തതയുള്ളൊരു ശബ്ദമായി നിലകൊള്ളണമെന്നും അദ്ദേഹം പറഞ്ഞു.