കാൽഗറിയിലെ സ്കൂളിൽ ആർട്ടിഫിഷ്യൽ ഇൻ്റലിജൻസ് ദുരുപയോഗം ചെയ്ത സംഭവത്തിൽ പോലീസ് അന്വേഷണം ആരംഭിച്ചു

കാൽഗറിയിലെ ഒരു ജൂനിയർ ഹൈസ്കൂളിൽ ആർട്ടിഫിഷ്യൽ ഇന്റലിജൻസ് (AI) ദുരുപയോഗം ചെയ്ത സംഭവത്തിൽ പോലീസ് അന്വേഷണം ആരംഭിച്ചു. വിദ്യാർത്ഥികൾ തങ്ങളുടെ സഹപാഠികളുടെ അശ്ലീല ചിത്രങ്ങൾ നിർമ്മിക്കാൻ AI ഉപയോഗിച്ചതായാണ് പരാതി. ഇത്തരത്തിൽ നിർമ്മിച്ച ചിത്രങ്ങൾ സോഷ്യൽ മീഡിയ വഴി സ്കൂളിന് പുറത്തുള്ളവർക്കും പങ്കുവെച്ചിട്ടുണ്ട്.

ടസ്കാനിയിലെ 'ട്വൽവ് മൈൽ കൂലി' സ്കൂളിലാണ് സംഭവം നടന്നതെന്ന് കാൽഗറി ബോർഡ് ഓഫ് എഡ്യൂക്കേഷൻ സ്ഥിരീകരിച്ചു. കുട്ടികൾ നിർമ്മിച്ച ചിത്രങ്ങൾ തികച്ചും അനുചിതമാണെന്ന് സ്കൂൾ അധികൃതർ രക്ഷിതാക്കൾക്ക് അയച്ച ഇമെയിലിൽ വ്യക്തമാക്കി. സ്കൂൾ പരിസരം സുരക്ഷിതവും മാന്യവുമായി നിലനിർത്താൻ തങ്ങൾ പ്രതിജ്ഞാബദ്ധരാണെന്ന് അധികൃതർ അറിയിച്ചു.

വിദ്യാർത്ഥികൾക്കോ ജീവനക്കാർക്കോ എതിരെ ഉണ്ടാകുന്ന ഏത് ഭീഷണിയും അതീവ ഗൗരവത്തോടെ മാത്രമേ കാണൂ എന്ന് സ്കൂൾ വക്താക്കൾ അറിയിച്ചു. അന്വേഷണത്തിനായി കാൽഗറി പോലീസിന്റെയും സ്കൂൾ റിസോഴ്സ് ഓഫീസർമാരുടെയും സഹായം സ്കൂൾ തേടിയിട്ടുണ്ട്. കേസിൽ അന്വേഷണം പുരോഗമിക്കുകയാണെന്നും നിലവിൽ ആർക്കെതിരെയും കുറ്റം ചുമത്തിയിട്ടില്ലെന്നും പോലീസ് വ്യക്തമാക്കി.

സംഭവത്തിൻ്റെ പശ്ചാത്തലത്തിൽ ഇന്റർനെറ്റ് സുരക്ഷയെക്കുറിച്ചും ഡിജിറ്റൽ ഉത്തരവാദിത്തത്തെക്കുറിച്ചും കുട്ടികളുമായി തുറന്നു സംസാരിക്കണമെന്ന് രക്ഷിതാക്കളോട് അധികൃതർ ആവശ്യപ്പെട്ടു. കുട്ടികളുടെ ഫോണിലെ ആപ്പുകളും സെക്യൂരിറ്റി സെറ്റിംഗ്‌സുകളും കൃത്യമായി പരിശോധിക്കണമെന്നും അവർ നിർദ്ദേശിച്ചു. ഇത്തരം പ്രവൃത്തികൾ വെറും കുട്ടിക്കളിയല്ലെന്നും, ഇത് സ്കൂളിൽ നിന്നുള്ള പുറത്താക്കലിനും പോലീസ് നടപടികൾക്കും കാരണമാകുമെന്നും അധികൃതർ മുന്നറിയിപ്പ് നൽകി.