മുന് സിഎന്എന് അവതാരകന് ഡോണ് ലെമണ് അറസ്റ്റില്; മാധ്യമസ്വാതന്ത്ര്യത്തിന്മേലുള്ള കടന്നുകയറ്റമെന്ന് ആക്ഷേപം
By: 600002 On: Jan 31, 2026, 10:16 AMപി പി ചെറിയാന്
മിനസോട്ട: മിനസോട്ടയിലെ ഒരു പള്ളിയില് നടന്ന പ്രതിഷേധത്തിനിടെ നിയമലംഘനം നടത്തിയെന്നാരോപിച്ച് മുന് സിഎന്എന് മാധ്യമപ്രവര്ത്തകന് ഡോണ് ലെമണെ ലോസ് ഏഞ്ചല്സില് വച്ച് ഫെഡറല് ഏജന്റുകള് അറസ്റ്റ് ചെയ്തു. നിലവില് സ്വതന്ത്ര മാധ്യമപ്രവര്ത്തകനായി ജോലി ചെയ്യുന്ന ലെമണ്, ഗ്രമ്മി അവാര്ഡ് റിപ്പോര്ട്ട് ചെയ്യാന് എത്തിയപ്പോഴാണ് ബെവര്ലി ഹില്സില് വച്ച് പിടിയിലായത്.
മിനസോട്ടയിലെ സെന്റ് പോളിലുള്ള ഒരു പള്ളിയിലേക്ക് ഐസിഇ (ICE) വിരുദ്ധ പ്രതിഷേധക്കാര് അതിക്രമിച്ചു കയറിയ സംഭവവുമായി ബന്ധപ്പെട്ടാണ് അറസ്റ്റ്. ഇമിഗ്രേഷന് വിഭാഗത്തിലെ ഒരു ഉദ്യോഗസ്ഥന് ഈ പള്ളിയില് പാസ്റ്ററായി സേവനമനുഷ്ഠിക്കുന്നുണ്ട്.
പള്ളിയിലെ ശുശ്രൂഷ തടസ്സപ്പെടുത്തിയെന്നും, ഗൂഢാലോചന നടത്തിയെന്നും ഡോണ് ലെമണിനെതിരെ ആരോപണമുണ്ട്. എന്നാല് താന് ഒരു മാധ്യമപ്രവര്ത്തകന് എന്ന നിലയില് വാര്ത്ത റിപ്പോര്ട്ട് ചെയ്യാനാണ് അവിടെ എത്തിയതെന്ന് ലെമണ് വ്യക്തമാക്കി.
ട്രംപ് ഭരണകൂടം മാധ്യമപ്രവര്ത്തകരെ വേട്ടയാടുകയാണെന്ന് ലെമണിന്റെ അഭിഭാഷകരും കാലിഫോര്ണിയ ഗവര്ണര് ഗാവിന് ന്യൂസമും ആരോപിച്ചു. പത്രസ്വാതന്ത്ര്യത്തിന്മേലുള്ള കടന്നുകയറ്റമാണിതെന്നാണ് ഇവരുടെ പക്ഷം.
കോടതിയില് ഹാജരാക്കിയ ലെമണെ സ്വന്തം ജാമ്യത്തില് വിട്ടയച്ചു. തന്നെ നിശബ്ദനാക്കാന് കഴിയില്ലെന്നും, മാധ്യമപ്രവര്ത്തനം തുടരുമെന്നും കോടതിക്ക് പുറത്തിറങ്ങിയ അദ്ദേഹം മാധ്യമങ്ങളോട് പറഞ്ഞു.