ഭീകര സംഘടനകൾക്ക് സാമ്പത്തിക സഹായം: കാനഡയിൽ നിന്ന് കാർ കയറ്റുമതിക്കാരനെ നാടുകടത്താൻ കോടതി ഉത്തരവ്

 

ടൊറൻ്റോ ആസ്ഥാനമായി പ്രവർത്തിക്കുന്ന വാണിജ്യ പ്രമുഖൻ ഫഹദ് സോവാനെയെ രാജ്യത്ത് നിന്ന് പുറത്താക്കാൻ കനേഡിയൻ ഫെഡറൽ കോടതി ഉത്തരവിട്ടു. ഇറാൻ പിന്തുണയുള്ള ഭീകര സംഘടനയായ ഹിസ്ബുള്ളയ്ക്ക് വേണ്ടി കാനഡയിൽ നിന്ന് പണം വെളുപ്പിച്ചതായി കണ്ടെത്തിയതിനെത്തുടർന്നാണിത്.  മിസിസ്സാഗ നിവാസിയായ സോവാനെ, ഔഡി, ബിഎംഡബ്ല്യു തുടങ്ങിയ ആഡംബര വാഹനങ്ങൾ ഹിസ്ബുള്ളയുടെ നിയന്ത്രണത്തിലുള്ള ബെയ്‌റൂട്ട് തുറമുഖത്തേക്ക് കയറ്റുമതി ചെയ്യുകയും, തത്തുല്യമായ തുക ബാങ്കിംഗ് ഇതര മാർഗങ്ങളിലൂടെ ഭീകരപ്രവർത്തനങ്ങൾക്കായി കൈമാറുകയും ചെയ്തു എന്നാണ് കാനഡ ബോർഡർ സർവീസസ് ഏജൻസിയും രഹസ്യാന്വേഷണ വിഭാഗവും കണ്ടെത്തിയത്.

കാനഡയിൽ താമസിക്കാനുള്ള നിയമപരമായ അനുമതി ഇതോടെ റദ്ദാക്കപ്പെട്ടു. രാജ്യത്തിൻ്റെ സുരക്ഷയ്ക്ക് ഭീഷണിയാണെന്ന വിലയിരുത്തലിനെ തുടർന്നാണ് നടപടി. 
ബാങ്കിംഗ് സംവിധാനങ്ങളുടെ കർശനമായ നിരീക്ഷണങ്ങൾ ഒഴിവാക്കാൻ വാഹനങ്ങൾ വാങ്ങി വിദേശത്തേക്ക് അയക്കുന്ന രീതി ഹിസ്ബുള്ളയുടെ പരിചിതമായ സാമ്പത്തിക തന്ത്രമാണെന്ന് ഇൻ്റലിജൻസ് വിദഗ്ധർ ചൂണ്ടിക്കാട്ടുന്നു. എന്നാൽ ആരോപണങ്ങൾ നിഷേധിച്ച സോവാനെയുടെ അഭിഭാഷകൻ, വ്യക്തമായ തെളിവുകളില്ലാതെയാണ് ഇത്തരമൊരു നടപടിയെന്ന് വാദിക്കുകയും സർക്കാരിൻ്റെ നീക്കം രാഷ്ട്രീയ പ്രേരിതമാണെന്ന് ആരോപിക്കുകയും ചെയ്തു.  ഫെഡറൽ കോടതി സർക്കാർ കണ്ടെത്തലുകൾ ശരിവെച്ച സാഹചര്യത്തിൽ, സോവാനെയെ എത്രയും വേഗം കാനഡയിൽ നിന്ന് നാടുകടത്താനുള്ള നടപടികൾ അധികൃതർ ഊർജിതമാക്കിയിട്ടുണ്ട്.