വീടുകളുടെ വില കുറയ്ക്കുന്നതിലല്ല, മറിച്ച് വില വര്ദ്ധിപ്പിക്കുന്നതിലാണ് തനിക്ക് താല്പ്പര്യമെന്ന് ട്രംപ്
By: 600002 On: Jan 30, 2026, 8:48 AM
പി പി ചെറിയാന്
വാഷിംഗ്ടണ് ഡി സി: വീടുകളുടെ വില കുറയ്ക്കുന്നതിലല്ല, മറിച്ച് വില വര്ദ്ധിപ്പിക്കുന്നതിലാണ് തനിക്ക് താല്പര്യമെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ്. ജനുവരി 29-ന് നടന്ന കാബിനറ്റ് യോഗത്തിലാണ് ഭവനവില സംബന്ധിച്ച തന്റെ നിലപാട് അദ്ദേഹം വ്യക്തമാക്കിയത്.
നിലവില് വീടുള്ളവരുടെ സമ്പത്ത് സംരക്ഷിക്കുന്നതിനായി ഭവനവില ഉയര്ന്നുതന്നെ ഇരിക്കണമെന്നാണ് ആഗ്രഹിക്കുന്നതെന്ന് ട്രംപ് പറഞ്ഞു. വില കുറയ്ക്കുന്നത് നിലവിലെ ഉടമകളുടെ ആസ്തി മൂല്യം ഇല്ലാതാക്കുമെന്നും അദ്ദേഹം കൂട്ടിച്ചേര്ത്തു.
വീടുകളുടെ വില കൂടുമ്പോഴും സാധാരണക്കാര്ക്ക് അത് വാങ്ങാന് കഴിയുന്ന രീതിയില് ബാങ്ക് പലിശ നിരക്കുകള് കുറയ്ക്കാനാണ് ഭരണകൂടം ലക്ഷ്യമിടുന്നത്. ഇതിനായി ഫെഡറല് റിസര്വ് മേധാവിയായി പുതിയൊരാളെ ഉടന് നാമനിര്ദ്ദേശം ചെയ്യും.
വന്കിട കോര്പ്പറേറ്റ് നിക്ഷേപകര് വീടുകള് കൂട്ടത്തോടെ വാങ്ങുന്നത് തടയാന് ജനുവരി 20-ന് ട്രംപ് ഉത്തരവിട്ടിരുന്നു. വീടുകള് കോര്പ്പറേറ്റുകള്ക്കുള്ളതല്ല, സാധാരണക്കാര്ക്ക് താമസിക്കാനുള്ളതാണെന്ന് അദ്ദേഹം വ്യക്തമാക്കി.
നിലവിലെ ഫെഡറല് റിസര്വ് ചെയര്മാന് ജെറോം പവല് പലിശ നിരക്ക് കുറയ്ക്കാന് തയ്യാറാകാത്തതിനെ ട്രംപ് രൂക്ഷമായി വിമര്ശിച്ചു. അടുത്തയാഴ്ച പുതിയ ചെയര്മാനെ പ്രഖ്യാപിക്കുമെന്നാണ് റിപ്പോര്ട്ടുകള്.
സാധാരണക്കാര്ക്ക് വീട് വാങ്ങുന്നത് എളുപ്പമാക്കുമെന്നും എന്നാല് അത് നിലവിലെ ഉടമകളെ ദരിദ്രരാക്കിക്കൊണ്ടാകില്ലെന്നും ട്രംപ് ഉറപ്പുനല്കി.