ട്രെയിന് യാത്രക്കാരനെ ക്രൂരമായി മര്ദ്ദിച്ച് കൊലപ്പെടുത്താന് ശ്രമിച്ച പ്രതിക്കു ജയില് ശിക്ഷയില്ല
By: 600002 On: Jan 30, 2026, 8:35 AM
പി പി ചെറിയാന്
ചിക്കാഗോ: ചിക്കാഗോയില് ട്രെയിന് യാത്രക്കാരനെ ക്രൂരമായി മര്ദ്ദിച്ച് കൊലപ്പെടുത്താന് ശ്രമിച്ച പ്രതി ജയില്ശിക്ഷ അനുഭവിക്കാതെ സ്വതന്ത്രനായി. 45-കാരനായ ജീസസ് റാമിറസ് എന്നയാളാണ് നിയമത്തിലെ ആനുകൂല്യങ്ങള് ഉപയോഗപ്പെടുത്തി ശിക്ഷാവിധിയില് നിന്ന് ഒഴിവായത്.
'പ്രതി ഇരയെ മര്ദ്ദിച്ച് കൊലപ്പെടുത്താന് നോക്കി' എന്ന് നേരത്തെ നിരീക്ഷിച്ച ജഡ്ജി അങ്കൂര് ശ്രീവാസ്തവയുടെ കോടതിയിലാണ് കേസ് നടന്നത്.
2024 ഏപ്രിലില് ചിക്കാഗോയിലെ പിങ്ക് ലൈന് ട്രെയിനില് വെച്ചാണ് റാമിറസ് ഒരു യാത്രക്കാരനെ ക്രൂരമായി മര്ദ്ദിച്ചത്. മുഖത്ത് തുടര്ച്ചയായി ഇടിക്കുകയും ചവിട്ടുകയും ചെയ്തതിനെത്തുടര്ന്ന് ഇരയായ 37-കാരന് ഒരാഴ്ചയോളം കോമയിലാവുകയും രണ്ട് മാസത്തോളം ആശുപത്രിയില് കഴിയുകയും ചെയ്തു.
കോടതിയില് കുറ്റം സമ്മതിച്ച റാമിറസിന് രണ്ട് വര്ഷം തടവുശിക്ഷയാണ് കോടതി വിധിച്ചത്.
ഇല്ലിനോയിസ് നിയമപ്രകാരം ഇലക്ട്രോണിക് മോണിറ്ററിംഗില് (ആങ്കിള് മോണിറ്റര്) കഴിഞ്ഞ സമയം ശിക്ഷാ കാലാവധിയായി കണക്കാക്കും. റാമിറസ് ഒരു വര്ഷത്തിലധികം ഇത്തരത്തില് നിരീക്ഷണത്തിലായിരുന്നു. കൂടാതെ, നല്ല പെരുമാറ്റത്തിന്റെ പേരില് ശിക്ഷാ കാലാവധി പകുതിയായി കുറയ്ക്കാനും നിയമം അനുവദിക്കുന്നു.
ഇരയുടെ തലച്ചോറില് രക്തസ്രാവം, വാരിയെല്ലുകള്ക്ക് ഒടിവ് എന്നിവയുള്പ്പെടെ ഗുരുതരമായ പരിക്കുകള് ഏല്പ്പിച്ച പ്രതി ഇത്ര വേഗം സ്വതന്ത്രനായത് വലിയ പ്രതിഷേധത്തിന് കാരണമായിട്ടുണ്ട്.