സണ്ണി വെയ്ലില് 20 വര്ഷത്തിന് ശേഷം നടന്ന കൊലപാതകക്കേസ്: പ്രതിക്ക് 12 വര്ഷം തടവ്
By: 600002 On: Jan 30, 2026, 8:17 AM
പി പി ചെറിയാന്
സണ്ണി വെയ്ല്: ടെക്സസിലെ സണ്ണി വെയ്ലില് 2023-ല് നടന്ന വെടിവെപ്പില് യുവതി കൊല്ലപ്പെട്ട കേസില് പ്രതി കുറ്റസമ്മതം നടത്തി. 27-കാരനായ ക്വാണ്ടവിയസ് ഗോമിലിയയ്ക്കാണ് കോടതി 12 വര്ഷം തടവ് ശിക്ഷ വിധിച്ചത്.
2023 ജൂണ് 4-ന് റിവര്സ്റ്റോണ് അപ്പാര്ട്ട്മെന്റില് വെച്ചാണ് ടൈഷ മെറിറ്റ് എന്ന യുവതി വെടിയേറ്റ് മരിച്ചത്.
കാറിലിരിക്കുകയായിരുന്ന ടൈഷയ്ക്കും കുടുംബത്തിനും നേരെ മുഖംമൂടി ധരിച്ചെത്തിയ പ്രതി വെടിയുതിര്ക്കുകയായിരുന്നു. ടൈഷയുടെ സഹോദരനും 8-നും 10-നും ഇടയില് പ്രായമുള്ള അദ്ദേഹത്തിന്റെ മൂന്ന് മക്കള്ക്കും സംഭവത്തില് പരിക്കേറ്റിരുന്നു. സണ്ണി വെയ്ലില് 20 വര്ഷത്തിന് ശേഷം നടക്കുന്ന ആദ്യ കൊലപാതകമാണിത്.
കൊലപാതകത്തിന് ശേഷം ഒരു വര്ഷത്തിലേറെ ഒളിവില് കഴിഞ്ഞ പ്രതിയെ 2024 ജൂണില് മിസിസിപ്പിയില് വെച്ചാണ് പിടികൂടിയത്.
ഫസ്റ്റ് ഡിഗ്രി കൊലപാതകക്കുറ്റം ചുമത്തപ്പെട്ട പ്രതി കഴിഞ്ഞ ആഴ്ചയാണ് കോടതിയില് കുറ്റം സമ്മതിച്ചത്.
സണ്ണി വെയ്ല് പോലീസ്, മെസ്ക്വിറ്റ്, കരോള്ട്ടണ് പോലീസ് ഡിപ്പാര്ട്ട്മെന്റുകള്, എഫ്.ബി.ഐ എന്നിവരുടെ സംയുക്ത അന്വേഷണമാണ് പ്രതിയെ കുടുക്കിയത്.
പ്രതിയെ നിയമത്തിന് മുന്നില് കൊണ്ടുവന്ന അന്വേഷണ സംഘത്തെ മലയാളിയായ സണ്ണി വെയ്ല് മേയര് സജി ജോര്ജ് അഭിനന്ദിച്ചു. ഇത്തരം കുറ്റകൃത്യങ്ങള് അപൂര്വ്വമായി മാത്രം സംഭവിക്കുന്ന നഗരത്തില് ജനങ്ങളുടെ സുരക്ഷ ഉറപ്പാക്കാന് പോലീസ് സജ്ജമാണെന്ന് അദ്ദേഹം വ്യക്തമാക്കി.