ഊർജ്ജ മേഖലയിൽ കൈകോർത്ത് ഇന്ത്യയും കാനഡയും: എണ്ണ, വാതക കയറ്റുമതി വർദ്ധിപ്പിക്കാൻ തീരുമാനം

നയതന്ത്ര ബന്ധങ്ങളിലെ വിള്ളലുകൾ പരിഹരിക്കപ്പെടുന്നതിൻ്റെ സൂചനകൾ നൽകിക്കൊണ്ട്, ഇന്ത്യയും കാനഡയും തമ്മിലുള്ള ഊർജ്ജ വ്യാപാരം ശക്തമാക്കാൻ ഇരുരാജ്യങ്ങളും തീരുമാനിച്ചു. ഗോവയിൽ നടന്ന 'ഇന്ത്യ എനർജി വീക്ക് 2026'-ൽ കനേഡിയൻ ഊർജ്ജ മന്ത്രി ടിം ഹോഡ്‌സണും ഇന്ത്യൻ പെട്രോളിയം-പ്രകൃതിവാതക മന്ത്രി ഹർദീപ് സിംഗ് പുരിയും തമ്മിൽ നടത്തിയ കൂടിക്കാഴ്ചയിലാണ് നിർണ്ണായക ധാരണയായത്.

പുതിയ കരാർ പ്രകാരം കാനഡയിൽ നിന്നുള്ള ക്രൂഡ് ഓയിൽ, ദ്രവീകൃത പ്രകൃതിവാതകം , എന്നിവയുടെ കയറ്റുമതി വർദ്ധിപ്പിക്കും. പകരം, ഇന്ത്യയിൽ നിന്നുള്ള ശുദ്ധീകരിച്ച പെട്രോളിയം ഉൽപ്പന്നങ്ങൾ കാനഡയിലേക്കും കയറ്റി അയക്കും. അമേരിക്കയുമായുള്ള വ്യാപാര തർക്കങ്ങൾ നിലനിൽക്കുന്ന പശ്ചാത്തലത്തിൽ, വിപണി വൈവിധ്യവൽക്കരിക്കാനുള്ള കനേഡിയൻ പ്രധാനമന്ത്രി മാർക്ക് കാർണിയുടെ നയതന്ത്ര നീക്കമായാണ് ഇത് വിലയിരുത്തപ്പെടുന്നത്.  
ഹൈഡ്രജൻ ഇന്ധനം, ബാറ്ററി സ്റ്റോറേജ്, നിർണ്ണായക ധാതുക്കൾ, ഊർജ്ജ മേഖലയിലെ ആർട്ടിഫിഷ്യൽ ഇൻ്റലിജൻസ് ഉപയോഗം തുടങ്ങിയ അത്യാധുനിക മേഖലകളിലും സഹകരിക്കാൻ ഇരുരാജ്യങ്ങളും സമ്മതിച്ചിട്ടുണ്ട്.

2024-ൽ ഇന്ത്യയും കാനഡയും തമ്മിലുള്ള വ്യാപാരം 13.3 ബില്യൺ കനേഡിയൻ ഡോളറിലെത്തിയിരുന്നു. ഇത് കൂടുതൽ ഉയർത്തുന്നതിനായി സമഗ്ര സാമ്പത്തിക പങ്കാളിത്ത കരാർ സംബന്ധിച്ച ചർച്ചകൾ വരും മാസങ്ങളിൽ നടക്കും. ഇതിൻ്റെ ഭാഗമായി പ്രധാനമന്ത്രി മാർക്ക് കാർണി ഉടൻ ഇന്ത്യ സന്ദർശിക്കുമെന്നാണ് പ്രതീക്ഷിക്കുന്നത്. പസഫിക് തീരം വഴിയുള്ള പുതിയ പൈപ്പ്‌ലൈൻ സൗകര്യങ്ങൾ ഉപയോഗപ്പെടുത്തി ഇന്ത്യയിലേക്കുള്ള എണ്ണ വിതരണം കൂടുതൽ സുഗമമാക്കാനാണ് കാനഡ ലക്ഷ്യമിടുന്നത്.