മഞ്ഞിൽ പുതഞ്ഞ് ടൊറൻ്റോ; സൈന്യത്തിൻ്റെ സഹായം തേടാനൊരുങ്ങി നഗരസഭ

ടൊറൻ്റോയിൽ ഉണ്ടായ അതിശക്തമായ മഞ്ഞുവീഴ്ച നഗരജീവിതത്തെ പൂർണ്ണമായും സ്തംഭിപ്പിച്ചു. റോഡുകളും നടപ്പാതകളും വാഹനങ്ങളും മഞ്ഞിനടിയിലായതോടെ നഗരം വലിയൊരു പ്രതിസന്ധിയിലാണ്. മഞ്ഞ് നീക്കം ചെയ്യാൻ നഗരസഭാ ജീവനക്കാർ രാപ്പകൽ പണിയെടുക്കുന്നുണ്ടെങ്കിലും കനത്ത മഞ്ഞുവീഴ്ചയെ തനിയെ നേരിടാൻ നഗരത്തിന് സാധിക്കുന്നില്ല.

നഗരത്തിലെ സ്ഥിതിഗതികൾ കണക്കിലെടുത്ത് കനേഡിയൻ സൈന്യത്തിന്റെ സഹായം തേടുന്ന കാര്യം പരിഗണനയിലാണെന്ന് മേയർ ഒലീവിയ ചൗ അറിയിച്ചു. മഞ്ഞ് നീക്കം ചെയ്യുന്നതിന് ആവശ്യമായ യന്ത്രസാമഗ്രികളും കൂടുതൽ ആളുകളെയും സൈന്യം നൽകിയേക്കും. മഞ്ഞുവീഴ്ച കാരണം പൊതുഗതാഗതം തടസ്സപ്പെടുകയും പല സർവ്വീസുകളും റദ്ദാക്കുകയും ചെയ്തു. ഇത് ജോലിക്ക് പോകുന്നവരെയും വിദ്യാർത്ഥികളെയും കാര്യമായി ബാധിച്ചിട്ടുണ്ട്.

 റോഡുകൾ മഞ്ഞിൽ മൂടിക്കിടക്കുന്നതിനാൽ ആംബുലൻസ് ഉൾപ്പെടെയുള്ള അടിയന്തര സേവനങ്ങൾക്ക് സമയത്തിന് എത്താൻ കഴിയാത്ത സാഹചര്യമാണുള്ളത്. വീടുകളിൽ ഒറ്റപ്പെട്ടുപോയ വയോധികരുടെയും മറ്റ് രോഗികളുടെയും സുരക്ഷയിൽ ജനങ്ങൾക്ക് വലിയ ആശങ്കയുണ്ട്. ഔദ്യോഗികമായി സൈന്യത്തിന്റെ സഹായം ചോദിക്കുന്നതിന് മുൻപ് നഗരത്തിന് എത്രത്തോളം പിന്തുണ വേണമെന്ന് ഉദ്യോഗസ്ഥർ വിലയിരുത്തുകയാണ്. ജനങ്ങളുടെ സുരക്ഷയ്ക്കാണ് മുൻഗണനയെന്നും മഞ്ഞ് നീക്കം ചെയ്യാനുള്ള നടപടികൾ ഊർജ്ജിതമാക്കുമെന്നും നഗരസഭ അറിയിച്ചു.