അഭയാർത്ഥി പദവി തേടുന്ന മുൻ പാകിസ്ഥാനി പൊലീസ് ഉദ്യോഗസ്ഥന് തൻ്റെ ഭാഗം വാദിക്കാൻ വീണ്ടും അവസരം നൽകി കാനഡ ഫെഡറൽ കോടതി

പാകിസ്താൻ പോലീസിലെ മുൻ ഉദ്യോഗസ്ഥൻ കാനഡയിൽ അഭയാർത്ഥി പദവിക്കായി നടത്തുന്ന നിയമപോരാട്ടത്തിൽ നിർണ്ണായക വഴിത്തിരിവ്. മാനവികതയ്‌ക്കെതിരായ കുറ്റകൃത്യങ്ങളിൽ പങ്കാളിയായെന്ന് ആരോപിച്ച് രാജ്യം പുറത്താക്കാൻ ഉത്തരവിട്ട മുനീർ അഹമ്മദ് മൽഹിക്ക്, തൻ്റെ ഭാഗം വാദിക്കാൻ കാനഡ ഫെഡറൽ കോടതി വീണ്ടും അവസരം നൽകി.

പാകിസ്താനിലെ പഞ്ചാബ് പോലീസ് സർവീസിൽ 1979 മുതൽ 2016 വരെ 37 വർഷത്തോളം ഹെഡ് കോൺസ്റ്റബിളായിരുന്നു മൽഹി. 2020-ലാണ് ഇദ്ദേഹം കാനഡയിൽ അഭയാർത്ഥി പദവി തേടിയെത്തിയത്. പീഡനം, ബലാത്സംഗം, വ്യാജ ഏറ്റുമുട്ടലുകൾ തുടങ്ങിയ ഗുരുതരമായ മനുഷ്യാവകാശ ലംഘനങ്ങൾ നടത്തുന്ന സേനയുടെ ഭാഗമായിരുന്ന ഒരാൾക്ക് അഭയാർത്ഥി സംരക്ഷണം നൽകാനാവില്ലെന്നായിരുന്നു ഇമിഗ്രേഷൻ വിഭാഗത്തിൻ്റെ ആദ്യ നിലപാട്.
സേനയുടെ കുറ്റകൃത്യങ്ങളിൽ മൽഹി നേരിട്ട് പങ്കെടുത്തതായി ഇമിഗ്രേഷൻ മന്ത്രാലയം ആരോപിക്കുന്നില്ലെങ്കിലും, വർഷങ്ങളോളം സേനയിൽ തുടർന്നതിലൂടെ അദ്ദേഹം ഈ ലംഘനങ്ങളിൽ അറിഞ്ഞുകൊണ്ട് പങ്കാളിയായിട്ടുണ്ടെന്നാണ് അധികൃതർ ചൂണ്ടിക്കാട്ടുന്നത്.

താൻ പോലീസിലെ ഒരു സാധാരണ മെയിൽ കാരിയർ മാത്രമായിരുന്നുവെന്ന മൽഹിയുടെ വാദം അദ്ദേഹത്തിൻ്റെ സർവീസ് റെക്കോർഡുകളിലെ സ്ഥാനക്കയറ്റങ്ങളുമായും പുരസ്കാരങ്ങളുമായും പൊരുത്തപ്പെടുന്നില്ലെന്ന് അന്വേഷണ ഏജൻസികൾ നിരീക്ഷിച്ചിരുന്നു. എന്നാൽ, അഹമ്മദിയാ വിശ്വാസിയായ താൻ പാകിസ്താനിൽ നേരിടുന്ന മതപരമായ പീഡനങ്ങൾ കണക്കിലെടുക്കണമെന്ന് മൽഹി ആവശ്യപ്പെടുന്നു. ഈ സാഹചര്യത്തിലാണ് അദ്ദേഹത്തിൻ്റെ നാടുകടത്തൽ നടപടികൾ പുനഃപരിശോധിക്കാൻ കോടതി ഉത്തരവിട്ടത്.