ബോർഡ് ഓഫ് പീസിൽ സ്ഥിര അംഗത്വത്തിന് ഒരു ബില്യൺ ഡോളർ നൽകില്ലെന്ന് കാനഡ

ഗാസയുടെ പുനർനിർമ്മാണത്തിനും ഭരണനിർവ്വഹണത്തിനും മേൽനോട്ടം വഹിക്കുന്നതിനായി അമേരിക്കൻ പ്രസിഡൻ്റ് ഡൊണാൾഡ് ട്രംപ് രൂപീകരിച്ച 'ബോർഡ് ഓഫ് പീസ്' സമിതിയിൽ സ്ഥിര അംഗത്വത്തിനായി കാനഡ ഒരു ബില്യൺ യുഎസ് ഡോളർ നൽകില്ലെന്ന് ധനമന്ത്രി ഫ്രാൻസ്വ-ഫിലിപ്പ് ഷാംപെയ്ൻ വ്യക്തമാക്കി. സ്വിറ്റ്‌സർലൻഡിലെ ദാവോസിൽ നടക്കുന്ന വേൾഡ് ഇക്കണോമിക് ഫോറത്തിനിടെയാണ് അദ്ദേഹം ഇക്കാര്യം അറിയിച്ചത്. സമിതിയിൽ ചേരുന്നതുമായി ബന്ധപ്പെട്ട ചർച്ചകൾ പ്രാഥമിക ഘട്ടത്തിലാണെന്നും, അംഗത്വത്തിനായി പണം നൽകുന്ന സാഹചര്യം കാനഡ പരിഗണിക്കുന്നില്ലെന്നും അദ്ദേഹം  പറഞ്ഞു.

സമിതിയുടെ പ്രവർത്തനങ്ങളെക്കുറിച്ചും ഫണ്ടിംഗിനെക്കുറിച്ചുമുള്ള പൂർണ്ണമായ വിവരങ്ങൾ ലഭ്യമായ ശേഷം മാത്രമേ അന്തിമ തീരുമാനം എടുക്കുകയുള്ളൂവെന്ന് പ്രധാനമന്ത്രി മാർക്ക് കാർണി നേരത്തെ വ്യക്തമാക്കിയിരുന്നു. ഗാസയിലെ ജനങ്ങൾക്ക് നേരിട്ട് സഹായം എത്തിക്കുന്നതിനാണ് കാനഡ മുൻഗണന നൽകുന്നത്. മാനുഷിക സഹായങ്ങൾ തടസ്സമില്ലാതെ ഗാസയിലെ ജനങ്ങളിലേക്ക് എത്തുന്നു എന്ന് ഉറപ്പുവരുത്തേണ്ടത് ഈ സമിതിയുമായി സഹകരിക്കുന്നതിന് മുന്നോടിയായുള്ള പ്രധാന നിബന്ധനയാണെന്നും പ്രധാനമന്ത്രി കൂട്ടിച്ചേർത്തു. മൂന്ന് വർഷത്തെ കാലാവധിക്ക് ശേഷം സമിതിയിൽ സ്ഥിര അംഗത്വം ലഭിക്കണമെങ്കിൽ അംഗരാജ്യങ്ങൾ ഒരു ബില്യൺ ഡോളർ നൽകണമെന്ന നിബന്ധനയോടാണ് കാനഡ വിയോജിപ്പ് പ്രകടിപ്പിച്ചത്.