വാഹനങ്ങൾ തടഞ്ഞുനിർത്താൻ പോലീസിന് അധികാരമുണ്ടോ? സുപ്രീം കോടതിയിൽ വാദം തുടരുന്നു

 

 

വാഹനങ്ങൾ യാതൊരു കാരണവുമില്ലാതെ തടഞ്ഞുനിർത്താൻ പോലീസിനുള്ള അധികാരം, വംശീയമായ വിവേചനത്തിന് കാരണമാകുന്നുവെന്ന് ചൂണ്ടിക്കാട്ടി ക്യുബെക്കിൽ നിന്നുള്ള ജോസഫ്-ക്രിസ്റ്റഫർ ലുവാംബ നൽകിയ കേസിൽ കാനഡ സുപ്രീം കോടതി വാദം കേൾക്കുന്നു. നേരത്തെ ക്യുബെക്ക് കീഴ്ക്കോടതികൾ പോലീസിൻ്റെ ഈ അമിതാധികാരം ഭരണഘടനാ വിരുദ്ധമാണെന്നും പൗരന്മാരുടെ അവകാശങ്ങൾ ലംഘിക്കുന്നതാണെന്നും വിധി പുറപ്പെടുവിച്ചിരുന്നു. ലൈസൻസ് ലഭിച്ച് ആദ്യ ഒന്നര വർഷത്തിനുള്ളിൽ പന്ത്രണ്ടോളം തവണ പോലീസ് തന്നെ തടഞ്ഞുവെന്നും തൻ്റെ വംശം നോക്കിയാണ് ഈ നടപടിയെന്നും ലുവാംബ കോടതിയിൽ വ്യക്തമാക്കി.

എന്നാൽ, റോഡ് സുരക്ഷ ഉറപ്പാക്കാൻ ഇത്തരം പരിശോധനകൾ അത്യാവശ്യമാണെന്നാണ് ക്യുബെക്ക് ഗവൺമെൻ്റ് കോടതിയിൽ വാദിക്കുന്നത്. മദ്യപിച്ചു വണ്ടി ഓടിക്കുന്നവരെ കണ്ടെത്താനും ഡ്രൈവിംഗ് ലൈസൻസ് പരിശോധിക്കാനും ഈ അധികാരം അത്യാവശ്യമാണെന്ന് സർക്കാർ അഭിഭാഷകർ ചൂണ്ടിക്കാട്ടി. 1990-ലെ ഒരു സുപ്രീം കോടതി വിധിയെ ആസ്പദമാക്കിയാണ് പോലീസ് നിലവിൽ ഇത്തരം പരിശോധനകൾ നടത്തുന്നത്. എങ്കിലും, ആധുനിക കാലഘട്ടത്തിലും വംശീയ വിവേചനം ഒരു യാഥാർത്ഥ്യമാണെന്നും പഴയ നിയമങ്ങൾ പുനഃപരിശോധിക്കണമെന്നുമാണ് ലുവാംബയുടെ അഭിഭാഷകർ വാദിക്കുന്നത്. കോടതിയുടെ അന്തിമ തീരുമാനം വരാൻ മാസങ്ങൾ എടുത്തേക്കാം.