ഫ്ളോറിഡയില് മണല്ക്കുഴി തകര്ന്ന് രണ്ട് ആണ്കുട്ടികള് മരിച്ചു: ഉറ്റസുഹൃത്തുക്കളുടെ ദാരുണാന്ത്യം
By: 600002 On: Jan 17, 2026, 11:25 AM
പി പി ചെറിയാന്
ഫ്ളോറിഡ: ഫ്ലോറിഡയിലെ സിട്രസ് കൗണ്ടിയില് മണല്ക്കുഴി കുഴിക്കുന്നതിനിടെ മണ്കൂന ഇടിഞ്ഞുവീണ് രണ്ട് ആണ്കുട്ടികള് ശ്വാസംമുട്ടി മരിച്ചു. ഇന്വര്നെസ് മിഡില് സ്കൂളിലെ വിദ്യാര്ത്ഥികളായ ജോര്ജ്ജ് വാട്ട്സ് (14), ഡെറിക് ഹബ്ബാര്ഡ് (14) എന്നിവരാണ് മരണപ്പെട്ടത്.
സ്പോര്ട്സ്മാന് പാര്ക്കില് കളിക്കുന്നതിനിടെ മണലില് ഏകദേശം 4-5 അടി ആഴമുള്ള കുഴിയെടുത്ത് അതില് തുരങ്കം നിര്മ്മിക്കുകയായിരുന്നു കുട്ടികള്. ഈ സമയത്ത് പെട്ടെന്ന് മണല് ഇടിയുകയും കുട്ടികള് അതിനുള്ളില് കുടുങ്ങുകയുമായിരുന്നു.
സഹോദരങ്ങളെപ്പോലെ വളര്ന്ന ഉറ്റ സുഹൃത്തുക്കളായിരുന്നു ഇരുവരുമെന്ന് കുടുംബാംഗങ്ങള് പറഞ്ഞു. ഒരു വിനോദം വലിയൊരു ദുരന്തമായി മാറിയതിന്റെ നടുക്കത്തിലാണ് പ്രദേശം.
കുട്ടികളുടെ കുടുംബങ്ങളെ സഹായിക്കുന്നതിനായി 'GoFundMe' വഴി ധനസമാഹരണം ആരംഭിച്ചിട്ടുണ്ട്. ഒരു മാതാപിതാക്കള്ക്കും ഉണ്ടാകാന് പാടില്ലാത്ത അത്രയും വലിയ നഷ്ടമാണിതെന്ന് ബന്ധുക്കള് കുറിച്ചു.
സമാനമായ അപകടങ്ങള് മുന്പും റിപ്പോര്ട്ട് ചെയ്യപ്പെട്ടിട്ടുള്ള സാഹചര്യത്തില്, മണല്ത്തിട്ടകളിലും കടല്തീരങ്ങളിലും വലിയ കുഴികള് നിര്മ്മിക്കുന്നത് ഒഴിവാക്കണമെന്ന് സുരക്ഷാ ഉദ്യോഗസ്ഥര് മുന്നറിയിപ്പ് നല്കി.