ടെക്സസിലെ കാറ്റിയില് ദമ്പതികള് വെടിയേറ്റ് മരിച്ച നിലയില്
By: 600002 On: Jan 13, 2026, 9:19 AM
പി പി ചെറിയാന്
ഹാരിസ് കൗണ്ടി: അമേരിക്കയിലെ ഹാരിസ് കൗണ്ടിയിലുള്ള കാറ്റി (Katy) മേഖലയില് ദമ്പതികളെ വീടിനുള്ളില് വെടിയേറ്റ് മരിച്ച നിലയില് കണ്ടെത്തി. തിങ്കളാഴ്ച പുലര്ച്ചെ അഞ്ചരയോടെയാണ് സംഭവം നടന്നത്.
ദമ്പതികളുടെ മക്കളാണ് വെടിയൊച്ച കേട്ട് പോലീസിനെ വിവരമറിയിച്ചത്. ദമ്പതികളെ വീടിന്റെ രണ്ട് ഭാഗങ്ങളിലായാണ് മരിച്ച നിലയില് കണ്ടെത്തിയത്. സംഭവസമയത്ത് ഇവരുടെ രണ്ട് മുതിര്ന്ന മക്കളും 7 വയസ്സുള്ള വളര്ത്തു മകളും വീട്ടിലുണ്ടായിരുന്നു. കുട്ടി ഓടിപ്പോയി അയല്വീട്ടില് അഭയം തേടി.
ഇതൊരു ഇരട്ടക്കൊലപാതകമാണോ അതോ കൊലപാതകത്തിന് ശേഷമുള്ള ആത്മഹത്യയാണോ എന്ന് പോലീസ് പരിശോധിച്ചുവരികയാണ്. വീട്ടിലേക്ക് ആരെങ്കിലും അതിക്രമിച്ചു കയറിയതിന്റെ ലക്ഷണങ്ങള് പ്രാഥമികമായി കണ്ടെത്തിയിട്ടില്ല.
കൊല്ലപ്പെട്ടവരുടെ കൂടുതല് വിവരങ്ങള് പോലീസ് പുറത്തുവിട്ടിട്ടില്ല. അന്വേഷണം പുരോഗമിക്കുകയാണ്.