മിസിസിപ്പിയില് യുവാവിന്റെ വെടിവെപ്പ്: സ്വന്തം കുടുംബാംഗങ്ങളും പാസ്റ്ററും ഉള്പ്പെടെ 6 മരണം; പ്രതി പിടിയില്
By: 600002 On: Jan 12, 2026, 11:44 AM
പി പി ചെറിയാന്
മിസിസിപ്പി: അമേരിക്കയിലെ മിസിസിപ്പിയില് മൂന്ന് വ്യത്യസ്ത സ്ഥലങ്ങളിലായി യുവാവ് നടത്തിയ വെടിവെപ്പില് ആറുപേര് കൊല്ലപ്പെട്ടു. ഡാരിക്ക എം. മൂര് എന്ന 24-കാരനാണ് തന്റെ പിതാവും സഹോദരനും ഉള്പ്പെടെയുള്ളവരെ വെടിവെച്ചു കൊന്നത്. ശനിയാഴ്ച പുലര്ച്ചെയായിരുന്നു നാടിനെ നടുക്കിയ ഈ സംഭവം.
പ്രതിയുടെ പിതാവ് (67), സഹോദരന് (33), അമ്മാവന് (55), ഏഴ് വയസ്സുകാരിയായ ബന്ധു, അപ്പോസ്തോലിക് ചര്ച്ച് പാസ്റ്ററും അദ്ദേഹത്തിന്റെ സഹോദരനുമാണ് കൊല്ലപ്പെട്ടവര്.
പോലീസ് റിപ്പോര്ട്ടുകള് പ്രകാരം, ആദ്യം സ്വന്തം വീട്ടില് വെച്ച് പിതാവിനെയും സഹോദരനെയും അമ്മാവനെയും പ്രതി വെടിവെച്ചു കൊന്നു. തുടര്ന്ന് സഹോദരന്റെ ട്രക്കുമായി മറ്റൊരു ബന്ധുവിന്റെ വീട്ടിലെത്തി ഏഴ് വയസ്സുകാരിയെ വധിച്ചു. അവിടെയുണ്ടായിരുന്ന മറ്റൊരു ചെറിയ കുട്ടിയെയും കൊല്ലാന് ശ്രമിച്ചെങ്കിലും തോക്ക് പ്രവര്ത്തിക്കാത്തതിനാല് ആ കുട്ടി രക്ഷപ്പെട്ടു. പിന്നീട് അടുത്തുള്ള പള്ളിയിലെത്തിയ പ്രതി, പാസ്റ്ററെയും സഹോദരനെയും വെടിവെച്ചു വീഴ്ത്തുകയായിരുന്നു.
സംഭവത്തിന് നാലര മണിക്കൂറിന് ശേഷം പോലീസ് ഏര്പ്പെടുത്തിയ റോഡ് ഉപരോധത്തിനിടെയാണ് പ്രതി പിടിയിലായത്. ഇയാളുടെ പക്കല് നിന്ന് റൈഫിളും ഹാന്ഡ്ഗണും കണ്ടെടുത്തു. നിലവില് ക്ലേ കൗണ്ടി ജയിലില് കഴിയുന്ന പ്രതിക്കെതിരെ കൊലപാതക കുറ്റം ചുമത്തി. പ്രതിക്ക് വധശിക്ഷ വാങ്ങി നല്കാനാണ് പ്രോസിക്യൂഷന് നീക്കം.
കൊലപാതകത്തിന് പ്രേരിപ്പിച്ച സാഹചര്യം വ്യക്തമല്ലെന്നും അന്വേഷണം പുരോഗമിക്കുകയാണെന്നും മിസിസിപ്പി പോലീസ് അറിയിച്ചു. സ്വന്തം കുടുംബാംഗങ്ങളെ തന്നെ വേട്ടയാടിയ ഈ സംഭവം മിസിസിപ്പിയിലെ പ്രാദേശിക സമൂഹത്തെ വലിയ ആഘാതത്തിലാഴ്ത്തിയിരിക്കുകയാണ്.