ടൊറൻ്റോയിൽ പ്രതിഷേധം അക്രമാസക്തം: പോലീസിന് നേരെയും ആക്രമണം; എട്ട് പേർ പിടിയിൽ

കഴിഞ്ഞ ശനിയാഴ്ച ടൊറന്റോ സിറ്റി ഹാളിന് മുന്നിലെ നേഥൻ ഫിലിപ്സ് സ്ക്വയറിൽ നടന്ന കുടിയേറ്റ വിരുദ്ധ റാലി അക്രമാസക്തമായി. 'കാനഡ ഫസ്റ്റ്' എന്ന സംഘടനയാണ് പ്രതിഷേധം സംഘടിപ്പിച്ചത്. എന്നാൽ വലിയൊരു വിഭാഗം ആളുകൾ ഈ നീക്കത്തെ എതിർത്ത് റാലിക്കെതിരെ രംഗത്തെത്തിയതോടെ പ്രദേശം സംഘർഷഭരിതമായി.

ഉച്ചയ്ക്ക് രണ്ട് മണിയോടെ സ്ഥലത്തെത്തിയ പോലീസ് സമാധാനം പുനഃസ്ഥാപിക്കാൻ ശ്രമിച്ചെങ്കിലും സ്ഥിതിഗതികൾ വഷളാകുകയായിരുന്നു. പ്രതിഷേധക്കാരിൽ ചിലർ പോലീസിന് നേരെ മുട്ടകളും ടോയ്‌ലറ്റ് പേപ്പറുകളും വലിച്ചെറിഞ്ഞു. സംഘർഷത്തിനിടയിൽ മൂന്ന് പോലീസ് ഉദ്യോഗസ്ഥർക്ക് നേരെ ആക്രമണമുണ്ടായെങ്കിലും ആർക്കും ഗുരുതരമായ പരിക്കേറ്റില്ല. സംഭവവുമായി ബന്ധപ്പെട്ട് ഒൻപത് പേരെ പോലീസ് കസ്റ്റഡിയിലെടുത്തു. ഇതിൽ ഒരാളെ പിന്നീട് വിട്ടയച്ചെങ്കിലും ബാക്കി എട്ടുപേർക്കെതിരെ പോലീസ് ഉദ്യോഗസ്ഥരെ മർദ്ദിച്ചതിനും ക്രമസമാധാന ലംഘനത്തിനും കേസെടുത്തിട്ടുണ്ട്.

പ്രതിഷേധക്കാർ നഗരസഭാ കെട്ടിടത്തിന്റെ മതിലുകൾക്കും ജനലുകൾക്കും കേടുപാടുകൾ വരുത്തിയതായി ജീവനക്കാർ അറിയിച്ചു. മണിക്കൂറുകളോളം നീണ്ട സംഘർഷം സിറ്റി ഹാളിന്റെ പ്രവർത്തനങ്ങളെ സാരമായി ബാധിച്ചു. ജീവനക്കാരുടെയും സന്ദർശകരുടെയും സുരക്ഷയ്ക്ക് ഭീഷണിയായ പ്രതിഷേധക്കാരുടെ പ്രവൃത്തികൾ നഗരത്തിന്റെ പ്രതിച്ഛായയ്ക്ക് മങ്ങലേൽപ്പിച്ചതായി വിമർശനമുയർന്നിട്ടുണ്ട്. സംഭവത്തിൽ വിശദമായ അന്വേഷണം നടന്നുവരികയാണെന്നും കൂടുതൽ പേർക്കെതിരെ നടപടിയുണ്ടാകുമെന്നും പോലീസ് വ്യക്തമാക്കി.