ഡാളസ് കേരള അസോസിയേഷന് സുവര്ണ്ണ ജൂബിലി ആഘോഷങ്ങള്ക്ക് ഉജ്ജ്വല തുടക്കം; ക്രിസ്മസ്-പുതുവത്സര പരിപാടികള് വര്ണ്ണാഭമായി
By: 600002 On: Jan 12, 2026, 9:53 AM
പി പി ചെറിയാന്
ഡാളസ്: കേരള അസോസിയേഷന് ഓഫ് ഡാലസിന്റെ അന്പതാം വാര്ഷികാഘോഷങ്ങള്ക്കും ക്രിസ്മസ്-പുതുവത്സര പരിപാടികള്ക്കും ജനുവരി 10-ന് ഗാര്ലന്ഡിലെ എം.ജി.എം ഓഡിറ്റോറിയത്തില് വര്ണ്ണാഭമായ തുടക്കം. 'സുവര്ണ്ണ ജൂബിലി' വര്ഷത്തിലേക്ക് പ്രവേശിക്കുന്ന അസോസിയേഷന്റെ ഈ വര്ഷത്തെ ആഘോഷങ്ങള് പ്രമുഖ കായിക ഇതിഹാസങ്ങളായ പത്മശ്രീ ഷൈനി വിത്സനും വിത്സന് ചെറിയാനും ചേര്ന്ന് ഭദ്രദീപം തെളിയിച്ച് ഉദ്ഘാടനം ചെയ്തു.
അസോസിയേഷന് പ്രസിഡന്റ് പ്രദീപ് നാഗനൂലിലിന്റെ അധ്യക്ഷതയില് ചേര്ന്ന സമ്മേളനത്തില്, ഷിജു അബ്രഹാമിന്റെ നേതൃത്വത്തിലുള്ള 2026-2027 വര്ഷത്തെ പുതിയ ഭരണസമിതി ഔദ്യോഗികമായി ചുമതലയേറ്റു. 1976-ല് പ്രവര്ത്തനമാരംഭിച്ച അസോസിയേഷന് അരനൂറ്റാണ്ടിന്റെ നിറവില് എത്തിനില്ക്കുന്നത് പ്രവാസി മലയാളി സമൂഹത്തിന് അഭിമാനകരമാണെന്ന് ചടങ്ങില് സംസാരിച്ചവര് ഓര്മ്മിപ്പിച്ചു.
കലാവിരുന്നിന്റെ വിസ്മയം സുബി ഫിലിപ്പിന്റെ ആമുഖത്തോടെ ആരംഭിച്ച പരിപാടികളില് ഡാലസിലെ പ്രമുഖ കലാകാരന്മാര് അണിനിരന്ന വിവിധ കലാരൂപങ്ങള് അരങ്ങേറി.
ഡാലസ് കൊയറിസ്റ്റേഴ്സ് അവതരിപ്പിച്ച ക്രിസ്മസ് മെഡ്ലിയും, യുണൈറ്റഡ് വോയ്സ് കമ്പൈന്ഡ് കൊയര് അവതരിപ്പിച്ച 'പ്രോസഷന് ഓഫ് ലൈറ്റും' കാണികള്ക്ക് നവ്യാനുഭവമായി.
ടീം ധൂല് , നര്ത്തന ഡാന്സ് സ്കൂള്, റിഥം ഓഫ് ഡാലസ് എന്നിവര് അവതരിപ്പിച്ച ബോളിവുഡ് ഫ്യൂഷന് നൃത്തങ്ങളും, 'ടീം നാട്യ'യുടെ സെമി-ക്ലാസിക്കല് ഡാന്സും പരിപാടികള്ക്ക് ആവേശം പകര്ന്നു.
മ്യൂസിക്കല് ഡ്രാമ: 'ദ സിംഫണി ഓഫ് ലൈറ്റ്സ്' എന്ന മ്യൂസിക്കല് ഡ്രാമ അവതരണ മികവ് കൊണ്ട് ശ്രദ്ധേയമായി.
ഫാഷന് ഷോ: 'ടീം ഫ്യൂഷന് എലഗന്സ്' അവതരിപ്പിച്ച ഫാഷന് ഷോ ആഘോഷങ്ങള്ക്ക് ഗ്ലാമര് പരിവേഷം നല്കി.
വിവിധ മേഖലകളില് മികവ് തെളിയിച്ചവര്ക്കുള്ള അവാര്ഡ് വിതരണവും ചടങ്ങില് നടന്നു. അസോസിയേഷന് സെക്രട്ടറി മന്ജിത് കൈനിക്കര നന്ദി രേഖപ്പെടുത്തി. ആഘോഷങ്ങളുടെ ഭാഗമായി നടന്ന 'ഫെസ്റ്റിവല് ഓഫ് കരോള്സും' വിഭവസമൃദ്ധമായ ഡിന്നറും പങ്കെടുത്തവര്ക്ക് മറക്കാനാവാത്ത അനുഭവമായി.
സുവര്ണ്ണ ജൂബിലി വര്ഷത്തില് വൈവിധ്യമാര്ന്ന നിരവധി പരിപാടികളാണ് വരും മാസങ്ങളില് ഡാലസ് കേരള അസോസിയേഷന് വിഭാവനം ചെയ്തിരിക്കുന്നത്.