കാനഡയിൽ തൊഴിലില്ലായ്മ നിരക്ക് 6.8 ശതമാനമായി ഉയർന്നു; വ്യാപാര യുദ്ധം തിരിച്ചടിയാകുന്നു

 

കാനഡയിൽ തൊഴിലില്ലായ്മ നിരക്ക് 6.8 ശതമാനമായി ഉയർന്നു. ​അമേരിക്കയുമായുള്ള വ്യാപാര തർക്കങ്ങളും പുതിയ ഇറക്കുമതി തീരുവകളുമാണ് തൊഴിൽ വിപണിയെ പ്രതികൂലമായി ബാധിച്ചത്.  രാജ്യത്തെ തൊഴിലില്ലായ്മ നിരക്ക് 2025 ഡിസംബറിൽ 6.8 ശതമാനമായി വർധിച്ചുവെന്നാണ് സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തത്. നവംബറിലെ 6.5 ശതമാനത്തിൽ നിന്നാണ് ഈ കുതിച്ചുചാട്ടം ഉണ്ടായത്.

ഡിസംബറിൽ 8,200 പുതിയ തൊഴിലവസരങ്ങൾ സൃഷ്ടിക്കപ്പെട്ടുവെങ്കിലും, തൊഴിൽ വിപണിയിലേക്ക് പുതുതായി എത്തിയ ഉദ്യോഗാർത്ഥികളെ ഉൾക്കൊള്ളാൻ സാധിക്കാത്തതാണ് നിരക്ക് ഉയരാൻ പ്രധാന കാരണമായത്. നിലവിൽ ഏകദേശം 16 ലക്ഷം ആളുകൾ രാജ്യത്ത് തൊഴിൽരഹിതരാണെന്നാണ് കണക്കുകൾ വ്യക്തമാക്കുന്നത്. ​യുവജനങ്ങളുടെ ഇടയിലെ തൊഴിലില്ലായ്മ 13.3 ശതമാനമായി ഉയർന്നത് വലിയ ആശങ്കയ്ക്ക് ഇടയാക്കുന്നുണ്ട്. ആരോഗ്യ മേഖലയിലും സാമൂഹിക സഹായ സേവനങ്ങളിലും പുതിയ നിയമനങ്ങൾ നടന്നപ്പോൾ, പ്രൊഫഷണൽ, സാങ്കേതിക മേഖലകളിൽ വൻതോതിൽ തൊഴിൽ നഷ്ടം റിപ്പോർട്ട് ചെയ്തു. 2026-ന്റെ ആദ്യ പകുതിയിലും വ്യാപാര യുദ്ധം മൂലമുള്ള അനിശ്ചിതത്വം നിലനിൽക്കുമെന്നും ബിസിനസ് സ്ഥാപനങ്ങൾ പുതിയ നിയമനങ്ങളിൽ നിന്ന് പിന്നോട്ട് മാറാൻ സാധ്യതയുണ്ടെന്നും സാമ്പത്തിക വിദഗ്ധർ മുന്നറിയിപ്പ് നൽകുന്നു.