ഡാലസ് കേരള അസോസിയേഷന് സുവര്ണ്ണ ജൂബിലി- ക്രിസ്മസ്-പുതുവത്സര ആഘോഷങ്ങള് ജനുവരി 10-ന്
By: 600002 On: Jan 9, 2026, 9:53 AM
പി പി ചെറിയാന്
ഡാളസ്: കേരള അസോസിയേഷന് ഓഫ് ഡാളസിന്റെ 50-ാം വാര്ഷികാഘോഷങ്ങള്ക്കും ക്രിസ്മസ്-പുതുവത്സര പരിപാടികള്ക്കും ജനുവരി 10-ന് തുടക്കമാകും. ഗാര്ലന്ഡിലെ എം.ജി.എം ഓഡിറ്റോറിയത്തില് വെച്ച് വൈകുന്നേരം 6 മണി മുതല് 8:30 വരെ പ്രസിഡന്റ് പ്രദീപ് നാഗനൂലിന്റെ അധ്യക്ഷതയിലാണ് ചടങ്ങുകള് സംഘടിപ്പിച്ചിരിക്കുന്നത്. ചടങ്ങില് പുതിയതായി തിരഞ്ഞെടുക്കപ്പെട്ട പ്രസിഡന്റ് ഷിജു അബ്രഹാമിന്റെ നേതൃത്വത്തിലുള്ള പുതിയ ഭരണസമിതി ചുമതലയേല്ക്കും.
ഇന്ത്യന് കായികരംഗത്തെ ഇതിഹാസ ദമ്പതികളായ പത്മശ്രീ ഷൈനി വിത്സനും വിത്സന് ചെറിയാനുമാണ് ഈ ആഘോഷ പരിപാടികളിലെ മുഖ്യാതിഥികള്. ഒളിമ്പ്യനും അര്ജുന അവാര്ഡ് ജേതാവുമായ ഷൈനി വിത്സനും, മുന് അന്താരാഷ്ട്ര നീന്തല് താരവും അര്ജുന അവാര്ഡ് ജേതാവുമായ വിത്സന് ചെറിയാനും പങ്കെടുക്കുന്നത് സുവര്ണ്ണ ജൂബിലി വര്ഷത്തിന് ഏറെ മാറ്റുകൂട്ടുമെന്നു പ്രസിഡന്റ് പ്രദീപ് നാഗനൂലില് പറഞ്ഞു.
സാംസ്കാരിക സമ്മേളനത്തിന് പുറമെ ആര്ട്ട് ഡയറക്ടര് സുബി ഫിലിപ്പ് ,ട്രഷറര് ദീപക് നായര് എന്നിവരുടെ നേതൃത്വത്തില് ഡാലസിലെ കലാപ്രതിഭകള് അണിനിരക്കുന്ന കലാപ്രകടനങ്ങള്: ആവേശം പകരുന്ന നൃത്തപരിപാടികള്. കരോള് ഗീതങ്ങള്: ക്രിസ്മസ് വരവേല്പ്പിന്റെ ഭാഗമായുള്ള ഗാനാലാപനം. ഫാഷന് ഷോ: വര്ണ്ണാഭമായ ഫാഷന് ഷോ.തുട്ങ്ങി വിവിധ പരിപാടികളും ഒരുക്കിയിട്ടുണ്ട്:
ആഘോഷങ്ങളുടെ ഭാഗമായി വിഭവസമൃദ്ധമായ ക്രിസ്മസ്-പുതുവത്സര ഡിന്നറും ഉണ്ടായിരിക്കും.
1976-ല് പ്രവര്ത്തനമാരംഭിച്ച കേരള അസോസിയേഷന് ഓഫ് ഡാലസ്, അരനൂറ്റാണ്ടിന്റെ ചരിത്രമുറങ്ങുന്ന ഈ സുവര്ണ്ണ ജൂബിലി വര്ഷം വൈവിധ്യമാര്ന്ന പരിപാടികളോടെ ആഘോഷിക്കാനുള്ള ഒരുക്കത്തിലാണെന്ന് സെക്രട്ടറി മന്ജിത് കൈനിക്കര അറിയിച്ചു.
കൂടുതല് വിവരങ്ങള് കേരളം അസോസിയേഷന് ഓഫീസുമായോ ഭാരവാഹികളുമായോ ബന്ധപ്പെടേണ്ടതാണ്.