അമേരിക്കയിലേക്കുള്ള വിമാന സർവീസുകൾ വെട്ടിക്കുറച്ച് കനേഡിയൻ എയർലൈൻ കമ്പനികൾ

കാനഡയിലെ പ്രമുഖ വിമാനക്കമ്പനികൾ അമേരിക്കയിലേക്കുള്ള സർവീസുകൾ വെട്ടിക്കുറയ്ക്കുന്നു. കഴിഞ്ഞ വർഷത്തെ അപേക്ഷിച്ച് വിമാനങ്ങളിലെ സീറ്റുകളുടെ എണ്ണത്തിൽ 10% കുറവുണ്ടാകുമെന്നാണ് കണക്കുകൾ സൂചിപ്പിക്കുന്നത്. 2026 ജനുവരി മുതൽ മാർച്ച് വരെയുള്ള കാലയളവിൽ ഏകദേശം 4.5 ലക്ഷം സീറ്റുകളുടെ കുറവുണ്ടാകും. അതായത് പ്രതിദിനം 5,000 സീറ്റുകൾ വീതമാണ് കുറയുക.

 വെസ്റ്റ്‌ജെറ്റ് തങ്ങളുടെ യുഎസ് സർവീസുകളിൽ 20 ശതമാനത്തോളം കുറവ് വരുത്തിയിട്ടുണ്ട്. എയർ കാനഡ 7 ശതമാനവും ഫ്ലെയർ എയർലൈൻസ്  ഏകദേശം 60 ശതമാനവുമാണ് സർവീസുകൾ കുറച്ചത്. ഫ്ലോറിഡ, ലാസ് വെഗാസ്, ലോസ് ഏഞ്ചൽസ്, അറ്റ്‌ലാൻ്റ തുടങ്ങിയ വിനോദസഞ്ചാര കേന്ദ്രങ്ങളിലേക്കുള്ള യാത്രക്കാരെയാണ് ഇത് പ്രധാനമായും ബാധിക്കുക. യാത്രക്കാരുടെ താല്പര്യങ്ങളിൽ വന്ന മാറ്റമാണ് പ്രധാന കാരണമെന്ന് വിദഗ്ധർ ചൂണ്ടിക്കാട്ടുന്നു. യാത്രാച്ചെലവ് വർദ്ധിച്ചതോടെ പലരും അമേരിക്കയ്ക്ക് പകരം മെക്സിക്കോ, കോസ്റ്റാറിക്ക, ജപ്പാൻ, യുകെ തുടങ്ങിയ രാജ്യങ്ങളിലേക്ക് പോകാനാണ് ഇപ്പോൾ താല്പര്യപ്പെടുന്നത്.

അമേരിക്കയിലേക്കുള്ള സർവീസുകൾ കുറച്ചെങ്കിലും, കാനഡയ്ക്കകത്തുള്ള ആഭ്യന്തര സർവീസുകൾ വിമാനക്കമ്പനികൾ വർദ്ധിപ്പിച്ചിട്ടുണ്ട്. കുറഞ്ഞ നിരക്കിലുള്ള വിമാനക്കമ്പനികൾ  കൂടുതൽ പ്രാദേശിക റൂട്ടുകൾ ആരംഭിക്കുന്നത് സാധാരണക്കാർക്ക് ഗുണകരമാകും. ചുരുക്കത്തിൽ, അമേരിക്കൻ യാത്രകൾക്ക് ഇനി ചിലവ് കൂടാൻ സാധ്യതയുണ്ട്. എന്നാൽ മറ്റു രാജ്യങ്ങളിലേക്കും ആഭ്യന്തര കേന്ദ്രങ്ങളിലേക്കും കൂടുതൽ യാത്രകൾക്കുള്ള സൌകര്യം ഒരുങ്ങുകയും ചെയ്യും.