മിനിയാപൊളിസില് ഐ.സി.ഇ ഏജന്റിന്റെ വെടിയേറ്റ് മരിച്ചത് 37-കാരിയായ റെനെ നിക്കോള് ഗുഡ്
By: 600002 On: Jan 8, 2026, 9:33 AM
പി പി ചെറിയാന്
മിനിയാപൊളിസ്: ബുധനാഴ്ച മിനിയാപൊളിസില് ഫെഡറല് ഏജന്റിന്റെ വെടിയേറ്റ് കൊല്ലപ്പെട്ട യുവതിയെ തിരിച്ചറിഞ്ഞു. മിനിയാപൊളിസില് സ്ഥിരതാമസമാക്കിയ 37 വയസ്സുകാരിയായ റെനെ നിക്കോള് ഗുഡ് ആണ് കൊല്ലപ്പെട്ടതെന്ന് അവരുടെ മാതാവ് ഡോണ ഗാംഗര് സ്ഥിരീകരിച്ചു.
മിനിയാപൊളിസിലെ പോര്ട്ട്ലാന്ഡ് അവന്യൂവില് ബുധനാഴ്ച രാവിലെയാണ് വെടിവയ്പ്പുണ്ടായത്. സംഭവസ്ഥലത്ത് വെച്ച് തന്നെ റെനെ കൊല്ലപ്പെട്ടു. തങ്ങളുടെ മകള് ഇത്തരമൊരു സംഭവത്തില് ഉള്പ്പെട്ടുവെന്ന് വിശ്വസിക്കാനാകുന്നില്ലെന്ന് കുടുംബം പറഞ്ഞു.
'അവള് അത്യന്തം കരുണയുള്ളവളും സ്നേഹനിധിയുമായ ഒരു മനുഷ്യനായിരുന്നു. മറ്റുള്ളവരെ സഹായിക്കാന് എപ്പോഴും മുന്നിലുണ്ടായിരുന്നു,' മാതാവ് ഡോണ വികാരാധീനയായി പറഞ്ഞു. വെടിവയ്പ്പ് നടന്ന സമയത്ത് അവള് ഭയപ്പെട്ടുപോയിട്ടുണ്ടാകാമെന്നും അവര് കൂട്ടിച്ചേര്ത്തു.
റെനെ നിക്കോള് ഒരു കവയിത്രിയും എഴുത്തുകാരിയുമായിരുന്നു. 2023-ല് മരിച്ച ടിമ്മി റേ മക്ലിന് ജൂനിയര് ആണ് റെനെയുടെ ഭര്ത്താവ്. ഇവര്ക്ക് നാലോ അഞ്ചോ വയസ്സുള്ള ഒരു മകനുണ്ട്. പിതാവ് മരിച്ചതിന് പിന്നാലെ അമ്മയെയും നഷ്ടപ്പെട്ട കുഞ്ഞിനെ ഏറ്റെടുക്കാന് റെനെയുടെ ബന്ധുക്കള് സന്നദ്ധത അറിയിച്ചിട്ടുണ്ട്.
എമിഗ്രേഷന് ആന്ഡ് കസ്റ്റംസ് എന്ഫോഴ്സ്മെന്റ് (ICE) ഏജന്റാണ് വെടിവച്ചതെന്ന് അധികൃതര് സ്ഥിരീകരിച്ചിട്ടുണ്ട്. പ്രതിഷേധക്കാരുമായുള്ള സംഘര്ഷത്തിനിടെയാണോ അതോ മറ്റ് സാഹചര്യത്തിലാണോ വെടിവയ്പ്പുണ്ടായത് എന്നതിനെക്കുറിച്ച് അന്വേഷണം നടക്കുകയാണ്.
മിനിയാപൊളിസ് സിറ്റി കൗണ്സില് അംഗങ്ങള് റെനെയുടെ മരണത്തില് അനുശോചനം രേഖപ്പെടുത്തി. സംഭവസ്ഥലത്ത് തടിച്ചുകൂടിയ നാട്ടുകാര് റെനെയുടെ ഓര്മ്മയ്ക്കായി പ്രാര്ത്ഥനകള് നടത്തി.