ബി.സി. പ്രീമിയർ ഇന്ത്യയിലേക്ക്: വ്യാപാര ബന്ധങ്ങൾ ശക്തിപ്പെടുത്താൻ പുതിയ നീക്കം

അമേരിക്കൻ വിപണിയെ മാത്രം ആശ്രയിക്കുന്നത് കുറയ്ക്കുന്നതിനും ഏഷ്യൻ രാജ്യങ്ങളുമായുള്ള വ്യാപാര ബന്ധം മെച്ചപ്പെടുത്തുന്നതിനുമായി  ബ്രിട്ടീഷ് കൊളംബിയ പ്രീമിയർ ഡേവിഡ് ഈബി അടുത്ത ആഴ്ച ഇന്ത്യ സന്ദർശിക്കും.  മന്ത്രി രവി കാലനും അദ്ദേഹത്തോടൊപ്പമുണ്ടാകും. ജനുവരി 12 മുതൽ 17 വരെയുള്ള സന്ദർശനത്തിൽ ഡൽഹി, മുംബൈ, ചണ്ഡീഗഡ്, ബെംഗളൂരു എന്നീ നഗരങ്ങളിലെ പ്രമുഖ കമ്പനികളുമായും സർക്കാർ പ്രതിനിധികളുമായും  കൂടിക്കാഴ്ച നടത്തും. അമേരിക്കൻ പ്രസിഡൻ്റ് ഡൊണാൾഡ് ട്രംപിൻ്റെ പുതിയ വ്യാപാര നയങ്ങളും തീരുവകളും ബി.സി.യിലെ വനം-വ്യവസായ മേഖലയെ പ്രതികൂലമായി ബാധിച്ച സാഹചര്യത്തിലാണ് വിപണി വൈവിധ്യവൽക്കരിക്കാനുള്ള ഈ നിർണ്ണായക തീരുമാനം.

ക്ലീൻ എനർജി, ഖനനം, സാങ്കേതിക വിദ്യ എന്നീ മേഖലകളിലെ സഹകരണത്തിനാണ് ഈ സന്ദർശനത്തിൽ മുൻഗണന നൽകുന്നത്. 2024-ൽ ബി.സി.യും ഇന്ത്യയും തമ്മിലുള്ള ഉഭയകക്ഷി വ്യാപാരം 2.1 ബില്യൺ ഡോളറിലെത്തിയിരുന്നു. ഇത് കാനഡയിൽ നിന്ന് ഇന്ത്യയിലേക്കുള്ള ആകെ കയറ്റുമതിയുടെ 25 ശതമാനമാണ്. ഇന്ത്യ വൈകാതെ ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയാകാൻ ഒരുങ്ങുന്ന പശ്ചാത്തലത്തിൽ, ഈ 'ലുക്ക് വെസ്റ്റ്' (Look West) തന്ത്രം ബ്രിട്ടീഷ് കൊളംബിയയിലെ ജനങ്ങൾക്ക് പുതിയ തൊഴിലവസരങ്ങൾ സൃഷ്ടിക്കുമെന്നും സാമ്പത്തിക സുരക്ഷിതത്വം നൽകുമെന്നും പ്രീമിയർ ഡേവിഡ് ഈബി പറഞ്ഞു. കാനഡയും ഇന്ത്യയും തമ്മിലുള്ള നയതന്ത്ര ബന്ധത്തിൽ നിലനിൽക്കുന്ന അസ്വാരസ്യങ്ങൾക്കിടയിലും സാമ്പത്തികമായ മുന്നേറ്റം ലക്ഷ്യമിട്ടാണ് ഈ ഔദ്യോഗിക സന്ദർശനം