വീടുകൾക്ക് ആവശ്യക്കാർ കുറയുന്നു , കാൽഗറിയിലെ ഭവന വിലയിൽ വൻ ഇടിവ്

പുതുവർഷത്തിലേക്ക് കടക്കുമ്പോൾ കാൽഗറിയിലെ ഭവന വിപണിയിൽ വലിയ മാറ്റങ്ങൾ പ്രകടമാകുന്നതായി റിപ്പോർട്ട്. കഴിഞ്ഞ വർഷം വീടുകളുടെ വിലയിലുണ്ടായ ഇടിവ് ആവശ്യക്കാർ കുറയുന്നതിൻ്റെ വ്യക്തമായ സൂചനയാണെന്ന് കാൽഗറി റിയൽ എസ്റ്റേറ്റ് ബോർഡ് (CREB) പുറത്തുവിട്ട ഏറ്റവും പുതിയ റിപ്പോർട്ട് വ്യക്തമാക്കുന്നു.

2024 ഡിസംബറിനെ അപേക്ഷിച്ച് ശരാശരി താമസവിലയിൽ 4.7 ശതമാനത്തിൻ്റെ കുറവാണുണ്ടായത്. നിലവിൽ 554,700 ഡോളറാണ് ശരാശരി വില. അപ്പാർട്ട്മെൻ്റുകളുടെ വിലയിലാണ് ഏറ്റവും വലിയ ഇടിവ് രേഖപ്പെടുത്തിയത്; 7.4 ശതമാനം കുറഞ്ഞ് വില 303,600 ഡോളറിലെത്തി. റോ ഹൗസുകൾക്ക് 5.6 ശതമാനവും (421,300 ഡോളർ), ഡിറ്റാച്ച്ഡ് വീടുകൾക്ക് 2.6 ശതമാനവും (726,900 ഡോളർ) വില കുറഞ്ഞു. സെമി-ഡിറ്റാച്ച്ഡ് വിഭാഗത്തിൽ 1.6 ശതമാനത്തിൻ്റെ കുറവാണ് രേഖപ്പെടുത്തിയത്.

പുതിയ ലിസ്റ്റിംഗുകളിൽ ഉണ്ടായ ഒൻപത് ശതമാനം വർദ്ധനവ് വിപണിയിൽ വീടുകളുടെ ലഭ്യത കൂട്ടി. കഴിഞ്ഞ വർഷത്തെ അപേക്ഷിച്ച് ഇൻവെൻ്ററിയിൽ 29 ശതമാനത്തോളം വർദ്ധനവുണ്ടായിട്ടുണ്ട്. നിലവിലെ സാഹചര്യത്തിൽ വിപണിയിലുള്ള വീടുകൾ വിറ്റുതീരാൻ ഏകദേശം മൂന്ന് മാസത്തിലധികം സമയമെടുക്കുമെന്ന് റിപ്പോർട്ട് ചൂണ്ടിക്കാട്ടുന്നു.കോണ്ടോകളിലും റോ ഹോമുകളിലും ഉണ്ടായ അമിതമായ ലഭ്യതയാണ് വില കുറയാൻ പ്രധാന കാരണമായതെന്ന് CREB ചീഫ് ഇക്കണോമിസ്റ്റ് വിലയിരുത്തി. 2025-ലെ വാർഷിക ശരാശരി ബെഞ്ച്മാർക്ക് വില 577,493 ഡോളറാണ്; ഇത് മുൻവർഷത്തെ അപേക്ഷിച്ച് രണ്ട് ശതമാനം കുറവാണ്.