ഓൺലൈനിൽ ലഹരി വിൽപന സജീവം: കാനഡയെ ഞെട്ടിച്ച് സി.ബി.സി അന്വേഷണ റിപ്പോർട്ട്

കാനഡയിൽ നിരോധിക്കപ്പെട്ട ലഹരിമരുന്നുകൾ ഓൺലൈനിലൂടെ പരസ്യമായി വിൽക്കപ്പെടുന്നതായി സി.ബി.സി (CBC) നടത്തിയ അന്വേഷണത്തിൽ കണ്ടെത്തി. ആമസോണിൽ സാധനങ്ങൾ ഓർഡർ ചെയ്യുന്നത് പോലെ എളുപ്പത്തിൽ കൊക്കെയ്ൻ, ഹെറോയിൻ, എക്സ്റ്റസി തുടങ്ങിയ മാരക ലഹരിമരുന്നുകൾ വാങ്ങാൻ ആർക്കും സാധിക്കും.

ക്രെഡിറ്റ് കാർഡുകൾ വഴിയോ ഇ-ട്രാൻസ്ഫറുകൾ വഴിയോ ആണ് ഇതിനുള്ള പണം നൽകുന്നത്. പണമടച്ചു കഴിഞ്ഞാൽ 'കാനഡ പോസ്റ്റ്' വഴി ലഹരിമരുന്ന് നേരിട്ട് വീടുകളിലെത്തും.  ചുരുങ്ങിയ ക്ലിക്കുകളിലൂടെ വേഗത്തിൽ കൊക്കെയ്ൻ ഓർഡർ ചെയ്യാമെന്ന് ചിലർ വ്യക്തമാക്കി. സാധാരണ തപാൽ ഉരുപ്പടികളുടെ രൂപത്തിലാണ് ഈ പാഴ്സലുകൾ വരുന്നത്. അതിനാൽ തന്നെ ഇവ കണ്ടെത്തുക വളരെ പ്രയാസകരമാണ്. അപകടകരമായ ലഹരിവസ്തുക്കൾ എത്രത്തോളം എളുപ്പത്തിൽ ഇന്ന് ലഭ്യമാകുന്നു എന്നതിലേക്കാണ് ഇത് വിരൽ ചൂണ്ടുന്നതെന്ന് വിദഗ്ധർ പറയുന്നു. 

ഇത്തരം ഡെലിവറികൾ തടയാൻ പോലീസും പോസ്റ്റൽ അധികൃതരും വലിയ രീതിയിൽ പ്രയാസപ്പെടുകയാണ്. ഓൺലൈൻ വിൽപന നിരീക്ഷിക്കുന്നതിൽ കാനഡയുടെ സുരക്ഷാ സംവിധാനങ്ങൾക്കുള്ള വീഴ്ചയാണ് ഈ അന്വേഷണം തുറന്നുകാട്ടുന്നത്. ഇത് രാജ്യത്തെ ലഹരി വിപത്തിനെ കൂടുതൽ വഷളാക്കുമെന്ന് വിമർശകർ മുന്നറിയിപ്പ് നൽകുന്നു.