കാൽഗറിയിൽ കുടിയേറ്റ തൊഴിലാളികളെ വഞ്ചിച്ച മൂന്ന് റെസ്റ്റോറൻ്റ് ഉടമകൾക്ക് തടവുശിക്ഷ

കാൽഗറിയിൽ കുടിയേറ്റ തൊഴിലാളികളെ വഞ്ചിച്ച മൂന്ന് റെസ്റ്റോറൻ്റ് ഉടമകൾക്ക് തടവുശിക്ഷ. വ്യാജ സർക്കാർ ഫീസുകൾ ഈടാക്കി കുടിയേറ്റ തൊഴിലാളികളെ വഞ്ചിച്ചെന്ന കുറ്റത്തിനാണ് കാൽഗറിയിലെ മൂന്ന് റെസ്റ്റോറൻ്റ് ഉടമകളെ കോടതി ജയിലിലടച്ചത്. കാനഡയിൽ ജോലി നിലനിർത്താൻ ഈ പണം നൽകേണ്ടത് അത്യാവശ്യമാണെന്ന് വിശ്വസിപ്പിച്ചാണ് ഇവർ താത്കാലിക വിദേശ തൊഴിലാളികളെ കബളിപ്പിച്ചത്. തങ്ങളെ വിശ്വസിച്ച നിസ്സഹായരായ മനുഷ്യരെ ഉടമകൾ ദുരുപയോഗം ചെയ്തുവെന്ന് ജസ്റ്റിസ് സാന്ദ്ര മാ നിരീക്ഷിച്ചു.

മണികണ്ഠൻ കാശിനാഥൻ, ചന്ദ്രമോഹൻ മർജക്, മേരി റോഷ് എന്നിവരാണ് ശിക്ഷിക്കപ്പെട്ടവർ. ഇവർക്ക് ഓരോരുത്തർക്കും 90 ദിവസത്തെ തടവുശിക്ഷയാണ് വിധിച്ചത്. ഇത് വാരാന്ത്യങ്ങളിൽ അനുഭവിച്ചാൽ മതിയാകും. ജയിൽ ശിക്ഷയ്ക്ക് പുറമെ 18 മാസത്തെ പ്രൊബേഷൻ കാലയളവും ഇവർക്കുണ്ടാകും. ഈ സമയത്ത് ഇരകളായ തൊഴിലാളികളുമായി യാതൊരു ബന്ധവും പുലർത്താൻ പാടില്ല എന്ന കർശന നിർദ്ദേശമുണ്ട്. പ്രോസിക്യൂഷൻ ഒൻപത് മാസത്തെ തടവാണ് ആവശ്യപ്പെട്ടതെങ്കിലും, ജഡ്ജി കുറഞ്ഞ കാലാവധിയാണ് നിശ്ചയിച്ചത്. സംരക്ഷണം കുറഞ്ഞ വിഭാഗങ്ങളെ ലക്ഷ്യം വെച്ചുള്ള ഗൗരവകരമായ കുറ്റമാണിതെന്ന് കോടതി വ്യക്തമാക്കി.

അൽബെർട്ട ഹോസ്പിറ്റാലിറ്റി അസോസിയേഷൻ ഈ നടപടിയെ ശക്തമായി അപലപിച്ചു. ഇത്തരം ചൂഷണങ്ങൾ അംഗീകരിക്കാനാവില്ലെന്നും, മിക്ക റെസ്റ്റോറൻ്റുകളും തൊഴിലാളികളോട് ഇങ്ങനെയല്ല പെരുമാറുന്നതെന്നും അവർ കൂട്ടിച്ചേർത്തു.താത്കാലിക വിദേശ തൊഴിലാളികൾ കാനഡയിൽ നേരിടുന്ന അപകടസാധ്യതകളിലേക്കാണ് ഈ കേസ് വിരൽ ചൂണ്ടുന്നത്. ഒപ്പം, തൊഴിലാളികളെ ചൂഷണം ചെയ്യുന്ന തൊഴിലുടമകൾക്ക് കടുത്ത ശിക്ഷയ്ക്ക് സാധ്യതയുണ്ടെന്ന സന്ദേശവും ഇത് നൽകുന്നു.