പുതുവർഷത്തെ വരവേറ്റ് കാനഡയിൽ 'പോളാർ പ്ലഞ്ച്'; മരംകോച്ചുന്ന തണുപ്പിലും ആവേശമായി നൂറുകണക്കിന് ആളുകൾ

അതിശൈത്യത്തെ വകവയ്ക്കാതെ തണുത്തുറഞ്ഞ തടാകങ്ങളിലും ജലാശയത്തിലും  മുങ്ങിക്കുളിച്ച് നൂറുകണക്കിന് കാനഡക്കാർ  പുതുവർഷത്തെ വരവേറ്റു. ദശാബ്ദങ്ങളായി തുടർന്നുപോരുന്ന 'പോളാർ പ്ലഞ്ച്' എന്ന ഈ സാഹസിക വിനോദത്തിന് ഇത്തവണയും വലിയ ജനപങ്കാളിത്തമാണ് ഉണ്ടായത്. നോവ സ്കോഷ്യയിലെ ഡാർട്ട്‌മൗത്തിലുള്ള ബാനൂക്ക് തടാകത്തിൽ മാത്രം അഞ്ഞൂറിലധികം ആളുകൾ മഞ്ഞുകട്ടകൾ നിറഞ്ഞ വെള്ളത്തിൽ മുങ്ങിക്കുളിക്കാനായി എത്തി.

പുതുവർഷത്തിൽ ഓരോ മാസവും വ്യത്യസ്തമായ കാര്യങ്ങൾ ചെയ്യുക എന്ന ലക്ഷ്യത്തിൻ്റെ ഭാഗമായാണ് താൻ ഈ സാഹസികതയ്ക്ക് മുതിർന്നതെന്ന് മെക്സിക്കോയിൽ നിന്നെത്തിയ വിനോദസഞ്ചാരി അലക്സാന്ദ്ര ലോപ്പസ്  പറഞ്ഞു. വെള്ളത്തിലിറങ്ങിയപ്പോൾ കാലുകൾക്ക് തീപിടിക്കുന്നതുപോലെയുള്ള അനുഭവമാണ് ഉണ്ടായതെന്നും എന്നാൽ മനസ്സിനെ ശാന്തമാക്കി മുങ്ങിക്കുളി വിജയകരമായി പൂർത്തിയാക്കിയതിൽ അഭിമാനമുണ്ടെന്നും അലക്സാന്ദ്ര കൂട്ടിച്ചേർത്തു.  'ഡാർക്ക്‌സൈഡ് ഡിപ്പേഴ്‌സ്' എന്ന സംഘടനയുടെ നേതൃത്വത്തിൽ നടന്ന ഈ പരിപാടിയിൽ 550 പേർ ഔദ്യോഗികമായി രജിസ്റ്റർ ചെയ്തിരുന്നു. പങ്കെടുക്കുന്നവർക്ക് പുറമെ, സുഹൃത്തുക്കളെയും പ്രിയപ്പെട്ടവരെയും പ്രോത്സാഹിപ്പിക്കാനായി വലിയൊരു ജനക്കൂട്ടവും തടാകതീരത്ത് തടിച്ചുകൂടിയിരുന്നു.