മദ്യപിച്ച് വിമാനം പറത്താനെത്തിയ എയർ ഇന്ത്യ പൈലറ്റ് വാൻകൂവർ വിമാനത്താവളത്തിൽ പിടിയിൽ

 

 

ക്രിസ്മസ് തലേന്ന് വാൻകൂവർ വിമാനത്താവളത്തിൽ വെച്ച് എയർ ഇന്ത്യ പൈലറ്റിനെ അധികൃതർ തടഞ്ഞുവെച്ചു. ഡൽഹിയിലേക്കുള്ള വിമാനം പുറപ്പെടുന്നതിന് മുൻപായി പൈലറ്റ് മദ്യപിച്ചിരുന്നു എന്ന് കണ്ടെത്തിയതിനെ തുടർന്നാണ് നടപടി.

ധാരാളം യാത്രക്കാരുമായി ദീർഘദൂര അന്താരാഷ്ട്ര സർവീസ് നടത്തേണ്ട വിമാനത്തിൻ്റെ പൈലറ്റായിരുന്നു ഇദ്ദേഹം. മദ്യഗന്ധം ശ്രദ്ധയിൽപ്പെട്ടതിനെത്തുടർന്ന് വിമാനത്താവള അധികൃതർ പരിശോധന നടത്തുകയും ഇദ്ദേഹത്തെ വിമാനം നിയന്ത്രിക്കുന്നതിൽ നിന്ന് തടയുകയുമായിരുന്നു. സുരക്ഷാ നിയമങ്ങൾ ലംഘിച്ചതിനാണ് കനേഡിയൻ അധികൃതർ ഇദ്ദേഹത്തെ തടഞ്ഞുവെച്ചത്. തുടർന്ന് ഇയാൾക്ക് പകരം മറ്റൊരു പൈലറ്റിനെ ഏർപ്പെടുത്തിയാണ് എയർ ഇന്ത്യ ഡൽഹി സർവീസ് നടത്തിയത്.

ഇതേ തുടർന്ന് യാത്രക്കാരുടെ സുരക്ഷ സംബന്ധിച്ച് വലിയ ആശങ്കകൾക്ക് കാരണമായിട്ടുണ്ട്. വിമാന സർവീസിന് മുൻപ് പൈലറ്റുമാർ മദ്യം ഉപയോഗിക്കുന്നത് വ്യോമയാന നിയമങ്ങൾപ്രകാരം കർശനമായി നിരോധിച്ചിട്ടുള്ളതാണ്. ഈ വിഷയത്തിൽ അന്വേഷണം നടത്തി വരികയാണെന്നും കുറ്റക്കാരനായ പൈലറ്റിനെതിരെ കർശന നടപടി സ്വീകരിക്കുമെന്നും എയർ ഇന്ത്യ അറിയിച്ചു.