റെസ്റ്റോറന്റ് ശുചിമുറിയില് ഒളിക്യാമറ: ജീവനക്കാരന് അറസ്റ്റില്
By: 600002 On: Jan 2, 2026, 8:14 AM
പി പി ചെറിയാന്
ഹൂസ്റ്റണ്, ടെക്സസ്: പ്രശസ്ത റെസ്റ്റോറന്റ് ശൃംഖലയായ 'ലൂപ്പേ ടോര്ട്ടിയ'യിലെ (Lupe Tortilla) ശുചിമുറിയില് ഒളിക്യാമറ സ്ഥാപിച്ച് സ്ത്രീകളുടെയും കുട്ടികളുടെയും ദൃശ്യങ്ങള് പകര്ത്തിയ ജീവനക്കാരന് പിടിയിലായി. 31 വയസ്സുകാരനായ ബെയ്സണ് ഏലിയാസ് പു എന്നയാളെയാണ് ഹെഡ്വിഗ് വില്ലേജ് പോലീസ് അറസ്റ്റ് ചെയ്തത്.
ഡിസംബര് 30-നാണ് റെസ്റ്റോറന്റിലെ ശുചിമുറിയില് ഒളിക്യാമറ കണ്ടെത്തിയത്. ഇതില് പ്രായപൂര്ത്തിയാകാത്ത പെണ്കുട്ടിയുടെയും സ്ത്രീകളുടെയും ദൃശ്യങ്ങള് പതിഞ്ഞിരുന്നു.
റെസ്റ്റോറന്റ് ജീവനക്കാരനായ ബെയ്സണ് ആണ് ക്യാമറ ഒളിപ്പിച്ചതെന്ന് കണ്ടെത്തിയതിനെ തുടര്ന്ന് ഡിസംബര് 31-ന് ഇയാളെ പോലീസ് പിടികൂടി. സ്വകാര്യത ലംഘിച്ച് ദൃശ്യങ്ങള് പകര്ത്തിയതിന് ഇയാള്ക്കെതിരെ കേസെടുത്തു. 1.5 ലക്ഷം ഡോളര് ബോണ്ടില് ജാമ്യം ലഭിച്ച ഇയാളെ വെള്ളിയാഴ്ച കോടതിയില് ഹാജരാക്കും.
ക്യാമറകള് എത്ര കാലമായി അവിടെ ഉണ്ടായിരുന്നുവെന്നും ഇത് എങ്ങനെയാണ് കണ്ടെത്തിയതെന്നും പോലീസ് വിശദമായി അന്വേഷിച്ചുവരികയാണ്.