ആഗോള താപനിലയിൽ റെക്കോർഡ് വർദ്ധന: 1.5 ഡിഗ്രി പരിധി ലംഘിക്കപ്പെട്ടതായി ശാസ്ത്രലോകം

മനുഷ്യൻ്റെ അനിയന്ത്രിതമായ ഇടപെടലുകൾ ആഗോള കാലാവസ്ഥയെ അപകടകരമായ അവസ്ഥയിലെത്തിച്ചിരിക്കുകയാണെന്ന് വേൾഡ് വെതർ ആട്രിബ്യൂഷൻ്റെ (WWA) റിപ്പോർട്ട്. സമുദ്രജലത്തെ തണുപ്പിക്കാൻ സഹായിക്കുന്ന 'ലാ നിന' പ്രതിഭാസം നിലവിലുണ്ടായിട്ടും ആഗോള താപനില കുറയാത്തത് ശാസ്ത്രലോകത്തെ ഞെട്ടിച്ചിരിക്കുകയാണ്. പാരീസ് ഉടമ്പടി ലക്ഷ്യമിട്ട 1.5 ഡിഗ്രി സെൽഷ്യസ് എന്ന പരിധി മൂന്ന് വർഷത്തെ ശരാശരി താപനിലയിൽ ആദ്യമായി മറികടന്നു. ഫോസിൽ ഇന്ധനങ്ങളുടെ ഉപയോഗം കുറച്ചില്ലെങ്കിൽ വരും വർഷങ്ങളിൽ പ്രത്യാഘാതങ്ങൾ അതീവ ഗുരുതരമായിരിക്കുമെന്ന് ശാസ്ത്രജ്ഞർ മുന്നറിയിപ്പ് നൽകുന്നു.

2025-ൽ ലോകമെമ്പാടും രേഖപ്പെടുത്തിയത് 157 അതിതീവ്ര കാലാവസ്ഥാ പ്രതിഭാസങ്ങളാണെന്ന് ശാസ്ത്രജ്ഞർ വെളിപ്പെടുത്തുന്നു. ഇവ ആയിരക്കണക്കിന് മനുഷ്യജീവനുകൾ കവരുകയും കോടിക്കണക്കിന് ഡോളറിൻ്റെ സാമ്പത്തിക നഷ്ടമുണ്ടാക്കുകയും ചെയ്തു. ഇതിൽ നൂറിലധികം മരണങ്ങൾക്കിടയാക്കിയ 22 പ്രധാന ദുരന്തങ്ങളെ വേൾഡ് വെതർ ആട്രിബ്യൂഷൻ (WWA) പ്രത്യേകം വിശകലനം ചെയ്തു. ഫോസിൽ ഇന്ധനങ്ങളുടെ ഉപയോഗം ഉടൻ നിയന്ത്രിച്ചില്ലെങ്കിൽ പ്രത്യാഘാതങ്ങൾ ഇതിലും ഭയാനകമാകുമെന്ന് ഇംപീരിയൽ കോളേജ് ലണ്ടനിലെ ഡോ. ഫ്രീഡെറിക് ഓട്ടോ മുന്നറിയിപ്പ് നൽകുന്നു. ആഗോളതലത്തിൽ ഉടനടി കർശനമായ നടപടികൾ സ്വീകരിക്കണമെന്ന് ശാസ്ത്രലോകം ആവശ്യപ്പെട്ടു.