മാനസ്' എന്ന ആർട്ടിഫിഷ്യൽ ഇൻ്റലിജൻസ് സ്റ്റാർട്ടപ്പിനെ സ്വന്തമാക്കി മെറ്റ

'മാനസ്' എന്ന ആർട്ടിഫിഷ്യൽ ഇൻ്റലിജൻസ് സ്റ്റാർട്ടപ്പിനെ സ്വന്തമാക്കി മെറ്റ. ഫേസ്‌ബുക്ക്, ഇൻസ്റ്റാഗ്രാം, വാട്ട്‌സ്ആപ്പ് എന്നിവയുടെ മാതൃകമ്പനിയാണ് മെറ്റ. രണ്ട് ബില്യൺ ഡോളറിൻ്റേതാണ് ഈ കരാർ. ചൈനീസ് സംരംഭകർ സ്ഥാപിച്ചതാണെങ്കിലും മാനസ് കമ്പനിയുടെ ആസ്ഥാനം സിംഗപ്പൂരിലാണ്.

ഏജൻ്റിക് എഐയുടെ നിർമ്മാതാക്കളാണ് ഈ കമ്പനി. അതായത് മറ്റ് എഐ ടൂളുകളെ അപേക്ഷിച്ച് കുറഞ്ഞ നിർദ്ദേശങ്ങൾ നൽകിയാൽ പോലും സ്വയം തീരുമാനങ്ങൾ എടുക്കാൻ ഇവയ്ക്ക് സാധിക്കും. മറ്റ് പല എഐ സ്റ്റാർട്ടപ്പുകളിൽ നിന്നും വ്യത്യസ്തമായി, സബ്‌സ്‌ക്രിപ്‌ഷനുകളിലൂടെ മാനസ് ഇതിനോടകം തന്നെ ലാഭം കൊയ്യുന്നുണ്ട്. മാനസിൻ്റെ സാങ്കേതികവിദ്യ ഉപയോഗിച്ച് തങ്ങളുടെ ആപ്പുകൾ കൂടുതൽ കാര്യക്ഷമമാക്കാൻ കഴിയുമെന്നാണ് മെറ്റ ലക്ഷ്യമിടുന്നത്. മെറ്റയുടെ പ്ലാറ്റ്‌ഫോമുകളിൽ നിന്ന് കൂടുതൽ വരുമാനം നേടാനും ഇത് സഹായിക്കുമെന്ന് സാമ്പത്തിക വിദഗ്ധർ വിലയിരുത്തുന്നു.

ഈ മേഖലയിൽ തങ്ങളുടെ ആധിപത്യം ഉറപ്പിക്കുന്നതിനായി മെറ്റ ഈ വർഷം പല എഐ കമ്പനികളെയും വാങ്ങുന്നുണ്ട്. നേരത്തെ, ഡാറ്റാ മേഖലയിൽ ശ്രദ്ധ കേന്ദ്രീകരിക്കുന്ന 'സ്കെയിൽ എഐ' (Scale AI) എന്ന കമ്പനിയെ 14 ബില്യൺ ഡോളറിന് മെറ്റ വാങ്ങിയിരുന്നു. ചൈനയിലെ 'വീചാറ്റ്' (WeChat) പോലെ ചാറ്റിംഗ്, പേയ്‌മെൻ്റുകൾ, മറ്റ് സേവനങ്ങൾ എന്നിവ വാട്ട്‌സ്ആപ്പിലും ഒരുമിച്ചു കൊണ്ടുവരാനാണ് മെറ്റ ലക്ഷ്യമിടുന്നത്. എന്നാൽ, മാനസ് കമ്പനിയുടെ ചൈനീസ് ബന്ധം കാരണം അമേരിക്കൻ റെഗുലേറ്റർമാർ ഈ കരാറിനെ ചോദ്യം ചെയ്തേക്കാനിടയുണ്ട്.