ആൽബർട്ടയിൽ വിദേശയിനം വളർത്തുമൃഗങ്ങളോടുള്ള പ്രിയം വർദ്ധിക്കുന്നു. ശ്രദ്ധ നേടി 17-കാരൻ

 

     
പാമ്പുകളും ചിലന്തികളും നിറഞ്ഞ ഒരു വീട് പലർക്കും പേടിസ്വപ്നമാണെങ്കിലും, കാനഡയിലെ ഒക്കടോക്സ് സ്വദേശിയായ നോളൻ ആസ്പ്ലണ്ടിന് ഇത് തൻ്റെ കുടുംബം പോലെയാണ്. 17 വയസ്സുകാരനായ ഈ യുവ ജീവശാസ്ത്രജ്ഞൻ തൻ്റെ വീട്ടിൽ എഴുപതിലധികം ഉരഗങ്ങളെയും (Reptiles) ജീവികളെയും വളർത്തുന്നുണ്ട്. 'ഫങ്കി ഫ്രഷ് റെപ്റ്റൈൽസ്' (Funky Fresh Reptiles) എന്ന പേരിൽ ഒരു സ്ഥാപനം തന്നെ ഇദ്ദേഹം നടത്തുന്നു. ബ്രസീലിയൻ റെയിൻബോ ബോവ, ബോൾ പൈത്തൺ തുടങ്ങിയ പാമ്പുകൾ മുതൽ വിഷമുള്ള തവളകളും തേളുകളും വരെ നോളൻ്റെ ശേഖരത്തിലുണ്ട്.

കഴിഞ്ഞ കുറച്ച് വർഷങ്ങളായി ആൽബർട്ടയിൽ, പ്രത്യേകിച്ച് കാൽഗറി മേഖലയിൽ വിദേശയിനം ജീവികളെ വളർത്തുന്നവരുടെ എണ്ണം വൻതോതിൽ വർദ്ധിച്ചുവരുന്നതായി നോളൻ പറയുന്നു. കാൽഗറി റെപ്റ്റൈൽ എക്സ്പോ പോലുള്ള വലിയ പ്രദർശനങ്ങൾ ഇതിന് തെളിവാണ്. വന്യതയിൽ നിന്ന് ജീവികളെ പിടികൂടി വളർത്തിയിരുന്ന പഴയ കാലഘട്ടത്തിൽ നിന്നും മാറി, ശാസ്ത്രീയമായ രീതിയിൽ ഇവയെ പ്രജനനം ചെയ്യാനും പരിപാലിക്കാനും ആധുനിക കാലത്ത് സാധിക്കുന്നുണ്ടെന്ന് ആൽബർട്ട റെപ്റ്റൈൽ ആൻഡ് ആംഫിബിയൻ സൊസൈറ്റി പ്രസിഡൻ്റ് കോഡി ഫോൾഡ്സ് അഭിപ്രായപ്പെട്ടു.

എങ്കിലും, വിദേശയിനം ജീവികളെ വീട്ടിൽ വളർത്തുന്നത് ഇപ്പോഴും തർക്കവിഷയമായി തുടരുകയാണ്. ഇത്തരം ജീവികളെ വളർത്തുന്നതിനോട് കനേഡിയൻ വെറ്ററിനറി മെഡിക്കൽ അസോസിയേഷൻ വിയോജിപ്പ് പ്രകടിപ്പിച്ചു. ചെറിയ തരം പാമ്പുകളോ പല്ലികളോ മനുഷ്യർക്ക് വലിയ അപകടമുണ്ടാക്കില്ലെങ്കിലും, വിഷപ്പാമ്പുകളെയും വലിപ്പമേറിയ മറ്റ് ഉരഗങ്ങളെയും വീട്ടിൽ വളർത്തുന്നത് സുരക്ഷാ ഭീഷണിയാണെന്ന് അസോസിയേഷൻ പ്രസിഡൻ്റ് ട്രാസി ഫിഷർ മുന്നറിയിപ്പ് നൽകി.