ബൈക്കിന് പിന്നിലിരുന്ന് ഉറങ്ങിപ്പോയി; തെറിച്ചുവീണ യുവതിക്ക് ദാരുണാന്ത്യം; ഡ്രൈവര് അറസ്റ്റില്
By: 600002 On: Dec 29, 2025, 12:42 PM
പി പി ചെറിയാന്
ഫ്ളോറിഡ: ഓടിക്കൊണ്ടിരുന്ന ബൈക്കിന് പിന്നിലിരുന്ന് ഉറങ്ങിപ്പോയ യുവതി റോഡിലേക്ക് തെറിച്ചുവീണ് മരിച്ചു. ഫ്ലോറിഡയില് ഇന്റര്സ്റ്റേറ്റ് 95 ഹൈവേയില് വെള്ളിയാഴ്ച ഉച്ചയോടെയാണ് ഈ ദാരുണമായ അപകടം നടന്നത്.
ബൈക്കിന് പിന്നിലിരുന്ന 34 വയസ്സുകാരി ഉറക്കത്തിനിടയില് റോഡരികിലെ ഗാര്ഡ് റെയിലിലേക്ക് തെറിച്ചുവീഴുകയായിരുന്നു. സംഭവസ്ഥലത്തുതന്നെ യുവതി മരിച്ചതായി ഫ്ലോറിഡ ഹൈവേ പെട്രോള് (FHP) അറിയിച്ചു.
അപകടത്തെത്തുടര്ന്ന് ബൈക്ക് ഓടിച്ചിരുന്ന റിക്കാര്ഡോ ബെര്ണല് (45) എന്നയാളെ പോലീസ് അറസ്റ്റ് ചെയ്തു. ഇയാള്ക്ക് ബൈക്ക് ഓടിക്കാനുള്ള ലൈസന്സ് ഇല്ലായിരുന്നുവെന്നും, മുന്പ് റദ്ദാക്കിയ ലൈസന്സ് ഉപയോഗിച്ചാണ് വാഹനം ഓടിച്ചതെന്നും പോലീസ് കണ്ടെത്തി. സ്ഥിരം ഗതാഗത നിയമങ്ങള് ലംഘിക്കുന്ന വ്യക്തിയാണ് ഇയാളെന്ന് അധികൃതര് വ്യക്തമാക്കി. മരിച്ച യുവതിയുടെ പേരുവിവരങ്ങള് പോലീസ് പുറത്തുവിട്ടിട്ടില്ല.