ഒൻ്റാരിയോയിൽ ചരക്ക് മോഷണം രൂക്ഷമാകുന്നു; ട്രക്കുകൾ തന്നെ കടത്തിക്കൊണ്ടുപോകുന്ന സംഘങ്ങൾ സജീവം

ഒൻ്റാരിയോയിൽ ചരക്ക് മോഷണം രൂക്ഷമാകുന്നു. ട്രക്കുകൾ തന്നെ കടത്തിക്കൊണ്ടുപോകുന്ന സംഘങ്ങൾ സജീവമായിരിക്കുകയാണ്. ട്രക്കിനുള്ളിലെ സാധനങ്ങൾ മാത്രം മോഷ്ടിക്കുന്നതിന് പകരം, ഇപ്പോൾ ട്രക്കുകൾ മുഴുവനായി തന്നെ കടത്തിക്കൊണ്ടു പോകുകയാണ്  കുറ്റവാളികൾ ചെയ്യുന്നത്. ഇതൊരു ഗുരുതരമായ പ്രശ്നമായി വളരുകയാണെന്ന് ഒൻ്റാരിയോ ട്രക്കിംഗ് അസോസിയേഷൻ (OTA) മുന്നറിയിപ്പ് നൽകി.

വിശ്രമകേന്ദ്രങ്ങളിലും പാർക്കിംഗ് ഏരിയകളിലും നിർത്തിയിട്ടിരിക്കുന്ന ചരക്ക് കയറ്റിയ ട്രക്കുകളാണ് മോഷ്ടാക്കളുടെ പ്രധാന ലക്ഷ്യം. മോഷ്ടിക്കപ്പെടുന്ന ട്രക്കുകൾ നിമിഷനേരം കൊണ്ട് മറ്റ് പ്രവിശ്യകളിലേക്കോ കടൽ കടന്ന് വിദേശരാജ്യങ്ങളിലേക്കോ മാറ്റപ്പെടുന്നു. ആഹാരസാധനങ്ങൾ, ഇലക്ട്രോണിക്സ് ഉപകരണങ്ങൾ, വീട്ടാവശ്യത്തിനുള്ള സാധനങ്ങൾ എന്നിവയാണ് സാധാരണയായി മോഷ്ടിക്കപ്പെടുന്നത്. ഈ മോഷണങ്ങൾക്ക് പിന്നിൽ സംഘടിത കുറ്റവാളി സംഘങ്ങളാണെന്ന് പോലീസ് വ്യക്തമാക്കുന്നു.

ഓരോ വർഷവും ട്രക്കിംഗ് കമ്പനികൾക്കും ഇൻഷുറൻസ് സ്ഥാപനങ്ങൾക്കും ദശലക്ഷക്കണക്കിന് ഡോളറിൻ്റെ നഷ്ടമാണ് ഇതുമൂലം ഉണ്ടാകുന്നത്. ഇത്തരം മോഷണങ്ങൾ നടക്കുമ്പോൾ ഡ്രൈവർമാരുടെ ജീവനും വലിയ സുരക്ഷാ ഭീഷണി നേരിടുന്നുണ്ട്. മോഷണം തടയാൻ കർശനമായ നിയമങ്ങളും ശക്തമായ പോലീസ് നടപടികളും വേണമെന്ന് ട്രക്കിംഗ് അസോസിയേഷൻ ആവശ്യപ്പെടുന്നു. പോലീസും സർക്കാരും ട്രക്കിംഗ് വ്യവസായ രംഗത്തുള്ളവരും തമ്മിൽ കൂടുതൽ സഹകരണം വേണമെന്നും ഇവർ ചൂണ്ടിക്കാട്ടുന്നു. ഡ്രൈവർമാരുടെ സുരക്ഷ ഉറപ്പാക്കാനും ഒൻ്റാരിയോയിലെ വിതരണ ശൃംഖല (Supply Chain) തകരാതെ സംരക്ഷിക്കാനുമാണ് ഈ ശ്രമങ്ങൾ.