വിവേക് രാമസ്വാമിക്കും ഉഷ വാന്സിനും നേരെയുള്ള വംശീയ അധിക്ഷേപം: റോ ഖന്ന ശക്തമായി അപലപിച്ചു
By: 600002 On: Dec 27, 2025, 12:45 PM
പി പി ചെറിയാന്
വാഷിംഗ്ടണ് ഡി സി : ഇന്ത്യന് വംശജരായ നേതാക്കള്ക്കെതിരെ തീവ്ര വലതുപക്ഷ നിരീക്ഷകന് നിക്ക് ഫ്യൂന്റസ് (Nick Fuentes) നടത്തുന്ന വംശീയ അധിക്ഷേപങ്ങളെ ശക്തമായി അപലപിച്ച് ഡെമോക്രാറ്റിക് കോണ്ഗ്രസ് അംഗം റോ ഖന്ന. വിവേക് രാമസ്വാമിയുടെ ഹിന്ദു വിശ്വാസത്തെയും രണ്ടാം പ്രഥമ വനിത ഉഷ വാന്സിന്റെ ഇന്ത്യന് പാരമ്പര്യത്തെയും ലക്ഷ്യം വച്ചുള്ള ഫ്യൂന്റസിന്റെ പരാമര്ശങ്ങള് ഭയാനകമാണെന്ന് റോ ഖന്ന പറഞ്ഞു.
വിവേക് രാമസ്വാമി ഒഹായോ ഗവര്ണറായാല് ഗവര്ണറുടെ ഔദ്യോഗിക വസതിയില് ക്രിസ്മസ് ആഘോഷങ്ങള് ഉണ്ടാകില്ലെന്നും പകരം ദീപാവലിയായിരിക്കും ആഘോഷിക്കുകയെന്നും ഫ്യൂന്റസ് ആക്ഷേപിച്ചിരുന്നു. വിവേക് രാമസ്വാമിയെ 'ആങ്കര് ബേബി' (Anchor Baby) എന്ന് വിളിച്ച് അധിക്ഷേപിച്ച ഫ്യൂന്റസ്, അദ്ദേഹം ക്രിസ്ത്യാനി അല്ലാത്തതിനാല് ഗവര്ണര് പദവിക്ക് അര്ഹനല്ലെന്നും വാദിച്ചു.
'വിവേക് രാമസ്വാമി ഹിന്ദുവായതിന്റെയും ഇന്ത്യന് പാരമ്പര്യമുള്ളതിന്റെയും പേരില് അദ്ദേഹത്തിനെതിരെ പ്രചാരണം നടത്തുന്നത് ഭയാനകമാണ്. നിന്റെ ഈ വിദ്വേഷത്തെ ഞാന് തള്ളിക്കളയുന്നു,' എന്ന് റോ ഖന്ന എക്സില് (X) കുറിച്ചു. തന്റെ കുടുംബമടക്കം പല ഹിന്ദു അമേരിക്കക്കാരും ക്രിസ്മസ് ആഘോഷിക്കാറുണ്ടെന്നും അദ്ദേഹം കൂട്ടിച്ചേര്ത്തു.
വൈസ് പ്രസിഡന്റ് ജെ.ഡി. വാന്സിന്റെ ഭാര്യ ഉഷ വാന്സിനെതിരെയും ഫ്യൂന്റസ് നേരത്തെ വംശീയ പരാമര്ശങ്ങള് നടത്തിയിരുന്നു. ഇതിനെതിരെ ജെ.ഡി. വാന്സും വിവേക് രാമസ്വാമിയും നേരത്തെ രംഗത്തെത്തിയിരുന്നു.
2026-ലെ ഒഹായോ ഗവര്ണര് തിരഞ്ഞെടുപ്പില് വിവേക് രാമസ്വാമിയെ തോല്പ്പിക്കുന്നത് വഴി 2028-ലെ പ്രസിഡന്റ് തിരഞ്ഞെടുപ്പില് ജെ.ഡി. വാന്സിന് മുന്നറിയിപ്പ് നല്കുകയാണ് തന്റെ ലക്ഷ്യമെന്നും ഫ്യൂന്റസ് അവകാശപ്പെട്ടു.