കാനഡയിൽ ബർത്ത് ടൂറിസം വീണ്ടും വർധിച്ചു വരുന്നതായി പുതിയ റിപ്പോർട്ട്

കാനഡയിൽ ബർത്ത് ടൂറിസം വീണ്ടും വർധിച്ചു വരുന്നതായി പുതിയ റിപ്പോർട്ടുകൾ സൂചിപ്പിക്കുന്നു. വിദേശികൾ കാനഡയിൽ വന്ന് കുഞ്ഞുങ്ങൾക്ക് ജന്മം നൽകുന്നതിലൂടെ ആ കുട്ടികൾക്ക് അവിടുത്തെ പൗരത്വം നേടിയെടുക്കുന്ന രീതിയെയാണ് ബർത്ത് ടൂറിസം എന്ന് വിളിക്കുന്നത്. കനേഡിയൻ ഇൻസ്റ്റിറ്റ്യൂട്ട് ഫോർ ഹെൽത്ത് ഇൻഫർമേഷൻ പുറത്തുവിട്ട കണക്കുകൾ പ്രകാരം, 2024–25 ബർത്ത് ടൂറിസത്തിലൂടെ 5,430 കുട്ടികൾ ജനിച്ചു. ഇത് കഴിഞ്ഞ വർഷത്തെ അപേക്ഷിച്ച് നാല് ശതമാനം കൂടുതലാണ്. ഇത് രാജ്യത്ത് രാഷ്ട്രീയ ചർച്ചകൾക്കും വഴി വച്ചിട്ടുണ്ട്.

കോവിഡ് കാലത്ത് യാത്രാ നിയന്ത്രണങ്ങൾ കാരണം ഈ എണ്ണത്തിൽ വലിയ കുറവുണ്ടായിരുന്നു. എന്നാൽ ഇപ്പോൾ ഇത് പാൻഡെമിക്കിന് മുമ്പുള്ള അവസ്ഥയിലേക്ക് തിരിച്ചെത്തി. ഒൻ്റാരിയോയിലെ ആശുപത്രികളിലാണ് ഏറ്റവും കൂടുതൽ ജനനങ്ങൾ നടന്നത്. ഏകദേശം 2,900 കുട്ടികൾക്കാണ് ഇവിടെ വച്ച് ജന്മം നല്കിയത്. നോർത്ത് യോർക്ക് ജനറൽ, ഹംബർ റിവർ തുടങ്ങിയ ആശുപത്രികളിൽ വലിയ വർധനവ് രേഖപ്പെടുത്തിയിട്ടുണ്ട്. വിസ നിയന്ത്രണങ്ങൾ കടുപ്പിച്ചിട്ടും ബർത്ത് ടൂറിസം കൂടുന്നത് കാനഡയിൽ വലിയ രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്. ജനിക്കുന്നവർക്ക് സ്വയമേവ പൗരത്വം നൽകുന്ന രീതി അവസാനിപ്പിക്കണമെന്ന് ചില നേതാക്കൾ ആവശ്യപ്പെട്ടു. ആഗോള യാത്രാ നയങ്ങളും കുടിയേറ്റ നിയമങ്ങളും കനേഡിയൻ ആശുപത്രികളെ എങ്ങനെ ബാധിക്കുന്നു എന്നതിൻ്റെ പ്രതിഫലനം കൂടിയാണ് ഈ ട്രെൻഡ് എന്ന് വിദഗ്ധർ അഭിപ്രായപ്പെടുന്നു.