ജോലി തേടി റഷ്യയിലെത്തിയ ഇന്ത്യക്കാർ നിർബന്ധപൂർവ്വം സൈന്യത്തിൽ ചേർക്കപ്പെട്ടെന്ന് റിപ്പോർട്ട് , പലരെയും കാണാനില്ലെന്നും കുടുംബങ്ങൾ

ജോലി തേടി റഷ്യയിലെത്തിയ ഇന്ത്യക്കാർ നിർബന്ധപൂർവ്വം സൈന്യത്തിൽ ചേർക്കപ്പെട്ടെന്ന് റിപ്പോർട്ട്. ഇവരിൽ പലരെയും കാണാനില്ലെന്നും കുടുംബങ്ങൾ പരാതിപ്പെട്ടു. റഷ്യയിൽ സിവിലിയൻ ജോലികൾ പ്രതീക്ഷിച്ചാണ് ഇന്ത്യയിൽ നിന്നുള്ള നിരവധി യുവാക്കൾ പോയത്. ഏജൻ്റുമാരുടെ ചതിക്കുഴിയിൽ വീണാണ് ഇവർ റഷ്യൻ സൈന്യത്തിൽ നിർബന്ധപൂർവ്വം ചേർക്കപ്പെട്ടത്. ഉക്രെയ്നിൽ യുദ്ധം ചെയ്യാൻ അയക്കപ്പെട്ടതിന് ശേഷം ഇവരിൽ പലരെയും കാണാനില്ലെന്ന് ഇന്ത്യയിലെ കുടുംബങ്ങൾ പറയുന്നു.

ജയ്പൂർ സ്വദേശിയായ മനോജ് സിംഗ് ഷെഖാവത്ത് ഒക്ടോബറിലാണ് കുടുംബവുമായി അവസാനമായി ബന്ധപ്പെട്ടത്. കുപ്യാൻസ്കിന് സമീപം വിന്യസിക്കപ്പെടുന്നതിന് തൊട്ടുമുമ്പായിരുന്നു അത്. മൂന്ന് ദിവസത്തിനുള്ളിൽ താൻ സന്ദേശം അയച്ചില്ലെങ്കിൽ, താൻ കൊല്ലപ്പെട്ടതായി കരുതാമെന്ന് അദ്ദേഹം തൻ്റെ ബന്ധുവിന് അയച്ച വോയിസ് നോട്ടിൽ മുന്നറിയിപ്പ് നൽകിയിരുന്നു. അദ്ദേഹത്തിൻ്റെ വിധി എന്താണെന്ന് ഔദ്യോഗികമായി സ്ഥിരീകരിച്ചിട്ടില്ലെങ്കിലും, ഒരു ഡ്രോൺ ആക്രമണത്തിൽ കൊല്ലപ്പെട്ടതായാണ് സഹപ്രവർത്തകർ പറയുന്നത്. ഹരിയാന സ്വദേശിയായ സന്ദീപ് എന്ന മറ്റൊരാൾക്ക് പാചകക്കാരനായി ജോലി നൽകാമെന്നായിരുന്നു വാഗ്ദാനം, എന്നാൽ അദ്ദേഹത്തിന് ലഭിച്ചത് യുദ്ധപരിശീലനമാണ്. താൻ വഞ്ചിക്കപ്പെട്ടുവെന്നും കുഴിബോംബുകൾ നിറഞ്ഞ അപകടകരമായ മേഖലകളിൽ പട്രോളിംഗിനായി അയക്കപ്പെട്ടുവെന്നും അദ്ദേഹം കുടുംബത്തോട് പറഞ്ഞു.

2022 മുതൽ കുറഞ്ഞത് 202 ഇന്ത്യക്കാരെ റഷ്യൻ സൈന്യത്തിലേക്ക് റിക്രൂട്ട് ചെയ്തിട്ടുണ്ടെന്ന് ഇന്ത്യൻ വിദേശകാര്യ മന്ത്രാലയം അറിയിച്ചു. ഇതിൽ 26 പേർ മരിക്കുകയും ഏഴ് പേരെ കാണാതാവുകയും ചെയ്തു. സർക്കാരിൻ്റെ ഇടപെടലിലൂടെ 119 പേരെ ഇതിനോടകം തിരിച്ചയച്ചു. ഇനിയും അവിടെ കുടുങ്ങിക്കിടക്കുന്നവരെ രക്ഷിക്കണമെന്ന് കുടുംബങ്ങൾ ഇന്ത്യൻ സർക്കാരിനോട് ആവശ്യപ്പെട്ടു.