കാനഡയുടെ കുടിയേറ്റ നയങ്ങളിൽ മാറ്റം: ആയിരക്കണക്കിന് പഞ്ചാബി തൊഴിലാളികൾ ആശങ്കയിൽ

കാനഡയുടെ കുടിയേറ്റ നിയമങ്ങളിൽ വന്ന മാറ്റങ്ങളെ തുടർന്ന്, ഇന്ത്യൻ തൊഴിലാളികളുടെയും വിദ്യാർത്ഥികളുടെയും, പ്രത്യേകിച്ച് പഞ്ചാബിൽ നിന്നുള്ളവരുടെ ഭാവി അനിശ്ചിതത്വത്തിലായതായി റിപ്പോർട്ട്. കാനഡയുടെ പുതിയ നയങ്ങൾ (ബിൽ സി-12 ഉൾപ്പെടെ) താൽക്കാലിക താമസക്കാർക്ക് പെർമനൻ്റ് റെസിഡൻസി നേടുന്നത് കൂടുതൽ ദുഷ്കരമാക്കിയിരിക്കുകയാണ്. പുതിയ നിയമങ്ങൾക്കെതിരെ ബ്രാംപ്ടണിൽ അന്താരാഷ്ട്ര വിദ്യാർത്ഥികളും വർക്ക് പെർമിറ്റ് ഉള്ളവരും ചേർന്ന് വലിയ പ്രതിഷേധ പ്രകടനം നടത്തി.

ഭവന-ആരോഗ്യ മേഖലകളിലെ പ്രതിസന്ധി പരിഹരിക്കാനായി പുതിയ കുടിയേറ്റക്കാരുടെ എണ്ണം 2025-ഓടെ 21 ശതമാനം കുറയ്ക്കാനാണ് സർക്കാർ തീരുമാനം. അടുത്ത വർഷം അവസാനത്തോടെ ആയിരക്കണക്കിന് താൽക്കാലിക പെർമിറ്റുകളുടെ കാലാവധി കഴിയും. ഇതിനുശേഷം വലിയൊരു വിഭാഗത്തിന് ഇന്ത്യയിലേക്ക് മടങ്ങേണ്ടി വരും. കാനഡയിലേക്കുള്ള ഒഴുക്ക് കുറഞ്ഞതോടെ പഞ്ചാബിലെ നിരവധി ഐ.ഇ.എൽ.ടി.എസ് (IELTS) കോച്ചിംഗ് സെൻ്ററുകളും ഇമിഗ്രേഷൻ ഓഫീസുകളും പൂട്ടിക്കഴിഞ്ഞു.തങ്ങളുടെ ആയുഷ്കാല സമ്പാദ്യം മുഴുവൻ മക്കളെ കാനഡയിലേക്ക് അയക്കാൻ ചെലവാക്കിയ കുടുംബങ്ങൾ ഇപ്പോൾ വലിയ കടക്കെണിയിലും ആശങ്കയിലുമാണ്. രാജ്യത്തെ ജനസംഖ്യാ വർദ്ധനവും അടിസ്ഥാന സൗകര്യങ്ങളുടെ പരിമിതിയും കണക്കിലെടുത്ത് ഇത്തരം നിയന്ത്രണങ്ങൾ അനിവാര്യമാണെന്നാണ് കനേഡിയൻ അധികൃതർ വ്യക്തമാക്കുന്നത്.