വീൽചെയറിൽ ബഹിരാകാശത്ത് എത്തുന്ന ആദ്യ വ്യക്തിയായി ജർമ്മൻ വനിതാ എഞ്ചിനീയർ

ബഹിരാകാശ വിനോദസഞ്ചാര രംഗത്ത് വിപ്ലവകരമായ മാറ്റം കുറിച്ചുകൊണ്ട്, വീൽചെയറിൽ ബഹിരാകാശ യാത്ര നടത്തുന്ന ആദ്യ വ്യക്തിയായി ജർമ്മൻ എഞ്ചിനീയർ മിഖായേല ബെന്തൗസ് മാറി. ജെഫ് ബെസോസിൻ്റെ ബഹിരാകാശ കമ്പനിയായ ബ്ലൂ ഒറിജിൻ്റെ 'ന്യൂ ഷെപ്പാർഡ്' പേടകത്തിൽ കഴിഞ്ഞ ശനിയാഴ്ചയാണ് വെസ്റ്റ് ടെക്സസിൽ നിന്ന് മിഖായേല അഞ്ചു യാത്രക്കാർക്കൊപ്പം പറന്നുയർന്നത്.

ഏഴ് വർഷം മുമ്പ് ഒരു മൗണ്ടൻ ബൈക്ക് അപകടത്തിൽ പരിക്കേറ്റ് കാലുകൾ തളർന്ന മിഖായേല, ഭൂമിയിൽ തൻ്റെ വീൽചെയർ ഉപേക്ഷിച്ച് ഏകദേശം 105 കിലോമീറ്റർ ഉയരത്തിൽ ബഹിരാകാശത്തിൻ്റെ അതിർത്തിയിൽ ഏതാനും മിനിറ്റുകൾ ഭാരമില്ലാത്ത അവസ്ഥ (Weightlessness) അനുഭവിച്ചറിഞ്ഞു. മുൻ സ്പേസ് എക്സ് എക്സിക്യൂട്ടീവ് ഹാൻസ് കോണിഗ്സ്മാനും ഈ ചരിത്ര യാത്രയിൽ അവരെ അനുഗമിച്ചിരുന്നു. പത്ത് മിനിറ്റ് നീണ്ടുനിന്ന ഈ ദൗത്യം ശാരീരിക വെല്ലുവിളികൾ നേരിടുന്നവർക്കും ബഹിരാകാശ യാത്ര സാധ്യമാണെന്ന് തെളിയിച്ചു. മിഖായേലയെ സഹായിക്കുന്നതിനായി പേടകത്തിനുള്ളിൽ ചെറിയ മാറ്റങ്ങൾ മാത്രമാണ് ബ്ലൂ ഒറിജിൻ വരുത്തിയത്. സീറ്റിലേക്ക് മാറുന്നതിനായി പ്രത്യേക ട്രാൻസ്ഫർ ബോർഡും, തിരിച്ചിറങ്ങിയ ശേഷം വീൽചെയറിൽ പ്രവേശിക്കാൻ മരുഭൂമിയിൽ പ്രത്യേക കാർപ്പെറ്റും ഒരുക്കിയിരുന്നു. "തൻ്റെ ജീവിതത്തിലെ ഏറ്റവും മികച്ച അനുഭവം" എന്നാണ് ലാൻഡിംഗിന് ശേഷം ആവേശത്തോടെ മിഖായേല ഈ യാത്രയെ വിശേഷിപ്പിച്ചത്. ശാരീരിക പരിമിതികൾ സ്വപ്നങ്ങൾക്ക് തടസ്സമല്ലെന്ന വലിയ സന്ദേശമാണ് ഈ യാത്രയിലൂടെ അവർ ലോകത്തിന് നൽകുന്നത്.