കാനഡയുടെ ആകാശത്ത് വർണ്ണവിസ്മയം: അത്ഭുതക്കാഴ്ചയായി നോർത്തേൺ ലൈറ്റ്‌സ്

 

കഴിഞ്ഞ ദിവസം രാത്രി കാനഡയുടെ വിവിധ ഭാഗങ്ങളിൽ ആകാശത്ത് അതിമനോഹരമായ നോർത്തേൺ ലൈറ്റ്‌സ് ദൃശ്യമായി. പച്ച, പർപ്പിൾ, ചുവപ്പ് നിറങ്ങൾ ആകാശത്ത് വിരിഞ്ഞത് കാനഡയിലെ പല പ്രവിശ്യകളിലും കാണാമായിരുന്നു. സാധാരണയായി ഇത്തരം കാഴ്ചകൾ അപൂർവ്വമായ വലിയ നഗരങ്ങളിൽ പോലും ഇത്തവണ ഈ പ്രതിഭാസം ദൃശ്യമായത് ശ്രദ്ധേയമായി. ടൊറന്റോ, വാൻകൂവർ തുടങ്ങിയ തെക്കൻ നഗരങ്ങളിലും ഇത്തവണ ആകാശക്കാഴ്ച ദൃശ്യമായി.

സൂര്യനിൽ നിന്നുള്ള അതിസൂക്ഷ്മ കണികകൾ ഭൂമിയുടെ അന്തരീക്ഷത്തിലേക്ക് പ്രവേശിക്കുമ്പോഴാണ് ഇവ ഉണ്ടാകുന്നത്. ഒരു ട്യൂബ് ലൈറ്റിലൂടെ വൈദ്യുതി കടന്നുപോകുമ്പോൾ അത് പ്രകാശിക്കുന്നതുപോലെ, ഈ കണികകൾ ആകാശത്തെ വാതകങ്ങളെ തിളക്കമുള്ളതാക്കി മാറ്റുന്നു.ഇതിന് മുന്നോടിയായി ശക്തമായ Geomagnetic storms-ന് സാധ്യതയുണ്ടെന്ന് 'നാഷണൽ ഓഷ്യാനിക് ആൻഡ് അറ്റ്മോസ്ഫെറിക് അഡ്മിനിസ്ട്രേഷൻ' മുന്നറിയിപ്പ് നൽകിയിരുന്നു. 

ഈ വർഷത്തെ ഏറ്റവും തിളക്കമേറിയ നോർത്തേൺ ലൈറ്റ്‌സ് ആയിരുന്നു ഇതെന്ന് 'എൻവയോൺമെന്റ് കാനഡ' സ്ഥിരീകരിച്ചു. വരും ദിവസങ്ങളിലും സൂര്യനിലെ പ്രവർത്തനങ്ങൾ ഉയർന്ന നിലയിൽ തുടരുകയാണെങ്കിൽ സമാനമായ കാഴ്ചകൾ ഇനിയും പ്രതീക്ഷിക്കാമെന്നും ഏജൻസി അറിയിച്ചു. പ്രകൃതിയുടെ അത്ഭുതകരമായ ഈ സൗന്ദര്യം കാനഡയിലുടനീളമുള്ള ആയിരക്കണക്കിന് ആളുകൾക്ക് ആവേശം പകർന്നു.

ഇതിനിടെ നോർത്തേൺ ലൈറ്റ്‌സ് എപ്പോൾ ദൃശ്യമാകുമെന്ന് പ്രവചിക്കാനുള്ള സംവിധാനവുമായി എഡ്മണ്ടനിൽ നിന്നുള്ള ജോഷ് ഷങ്കോവ്‌സ്കി എന്ന സംരംഭകൻ രംഗത്തെത്തിയത് ശ്രദ്ധേയമായി. ജോഷ്  വികസിപ്പിച്ചെടുത്ത 'അറോറ അഡ്മിൻ' ഇന്ന് 40-ലധികം രാജ്യങ്ങളിൽ ലഭ്യമായ ഒരു ആഗോള സേവനമാണ്. നേരിട്ടുള്ള എസ്.എം.എസ് (SMS) സന്ദേശങ്ങളിലൂടെയാണ് ഈ സേവനം ഉപയോക്താക്കളെ വിവരമറിയിക്കുന്നത്. ഇത് ഇന്റർനെറ്റ് ലഭ്യത കുറവുള്ള ഇടങ്ങളിലും പ്രവർത്തിക്കും.