മോൺട്രിയലിൽ വേഷം ധരിച്ചെത്തിയ ഒരു സംഘം സൂപ്പർ മാർക്കറ്റിൽ നിന്ന് സാധനങ്ങൾ കവർന്നു

 

മോൺട്രിയാലിൽ സാന്താക്ലോസിൻ്റെയും മാലാഖമാരുടെയും വേഷം ധരിച്ചെത്തിയ ഒരു സംഘം പലചരക്ക് കടയിൽ നിന്ന് സാധനങ്ങൾ കവർന്നു. തിരിച്ചറിയാതിരിക്കാൻ മെഡിക്കൽ മാസ്കുകൾ ധരിച്ചെത്തിയ ഇവർ സഞ്ചി നിറയെ ഭക്ഷണസാധനങ്ങളുമായി പണമടയ്ക്കാതെ കടന്നു കളയുകയായിരുന്നു. 

ഡിസംബർ 15-ന് രാത്രി പ്ലേറ്റോ-മോണ്ട്-റോയൽ ഏരിയയിലെ ലോറിയർ അവന്യൂവിലുള്ള ഒരു സൂപ്പർമാർക്കറ്റിലാണ് ഈ സംഭവം നടന്നത്. 'റോബിൻ ഡെസ് റുവൽസ്' എന്ന ഗ്രൂപ്പ് ഈ പ്രവൃത്തിയുടെ ഉത്തരവാദിത്തം ഏറ്റെടുത്തു. സാന്താ വേഷധാരികൾ ഭക്ഷണസാധനങ്ങൾ എടുക്കുന്നതിന്റെ വീഡിയോയും ഓൺലൈനിൽ പങ്കുവെച്ചിട്ടുണ്ട്. വൻകിട കോർപ്പറേറ്റുകൾക്കെതിരെയും ഭക്ഷണസാധനങ്ങളുടെ അമിതമായ വിലക്കയറ്റത്തിനെതിരെയും പ്രതിഷേധിക്കാനാണ് തങ്ങൾ ഇത് ചെയ്തതെന്ന് ഗ്രൂപ്പ് വ്യക്തമാക്കി. കടയിൽ നിന്ന് എടുത്ത സാധനങ്ങൾ ഇവർ മറ്റൊരു പ്രദേശത്തെ മരച്ചുവട്ടിൽ ആവശ്യക്കാർക്കായി വെക്കുകയും ചെയ്തു.

സംഭവത്തിൽ മോൺട്രിയാൽ പോലീസ് അന്വേഷണം ആരംഭിച്ചിട്ടുണ്ട്. 5,000 ഡോളറിൽ താഴെ മൂല്യമുള്ള സാധനങ്ങളാണ് നഷ്ടപ്പെട്ടത്. അതേസമയം, ഇത്തരം മോഷണങ്ങൾ വർധിച്ചു വരികയാണെന്നും, ഇത് ഒരിക്കലും അംഗീകരിക്കാനാവില്ലെന്നും മെട്രോ സൂപ്പർമാർക്കറ്റ് ശൃംഖല പ്രതികരിച്ചു. തങ്ങൾ ഇതിനോടകം തന്നെ ദശലക്ഷക്കണക്കിന് ഡോളറും ഭക്ഷണസാധനങ്ങളും സമൂഹത്തിന് സഹായമായി നൽകുന്നുണ്ടെന്നും കമ്പനി കൂട്ടിച്ചേർത്തു.