ജൂതവിരുദ്ധ പരാമര്ശം: സോഹ്റാന് മാംദാനിയുടെ ഉദ്യോഗസ്ഥ നിയമനം കഴിഞ്ഞ് ഒരു ദിവസത്തിനുള്ളില് രാജിവെച്ചു
By: 600002 On: Dec 19, 2025, 9:46 AM
പി പി ചെറിയാന്
ന്യൂയോര്ക്ക്: നിയുക്ത ന്യൂയോര്ക്ക് മേയര് സോഹ്റാന് മാംദാനിയുടെ അപ്പോയിന്റ്മെന്റ് ഡയറക്ടറായി ചുമതലയേറ്റ കാതറിന് അല്മോണ്ടെ ഡാ കോസ്റ്റ (Catherine Almonte Da Costa) സ്ഥാനമേറ്റ് ഒരു ദിവസത്തിനുള്ളില് രാജിവെച്ചു. വര്ഷങ്ങള്ക്ക് മുമ്പ് സോഷ്യല് മീഡിയയില് നടത്തിയ ജൂതവിരുദ്ധ പരാമര്ശങ്ങള് വിവാദമായതിനെത്തുടര്ന്നാണ് നടപടി.
പത്ത് വര്ഷങ്ങള്ക്ക് മുമ്പ് ഡാ കോസ്റ്റ തന്റെ എക്സ് (X) അക്കൗണ്ടില് 'പണക്കൊതിയന്മാരായ ജൂതന്മാര്' (Money hungry Jews) എന്നും മറ്റും നടത്തിയ പരാമര്ശങ്ങളാണ് ഇപ്പോള് പുറത്തുവന്നത്. 'ജഡ്ജ് സ്ട്രീറ്റ് ജേര്ണല്' ആണ് ഈ പഴയ പോസ്റ്റുകള് പുറത്തുവിട്ടത്.
ജൂതമതസ്ഥരായ കുട്ടികളുടെ അമ്മ കൂടിയായ താന് ആ വാക്കുകള് വരുത്തിയ മുറിവില് ഖേദിക്കുന്നുവെന്നും, പുതിയ ഭരണകൂടത്തിന്റെ പ്രവര്ത്തനങ്ങള്ക്ക് ഇതൊരു തടസ്സമാകാന് ആഗ്രഹിക്കാത്തതിനാലാണ് രാജി സമര്പ്പിക്കുന്നതെന്നും ഡാ കോസ്റ്റ പ്രസ്താവനയില് പറഞ്ഞു. തന്റെ 19-20 വയസ്സ് പ്രായത്തില് നടത്തിയ പരാമര്ശങ്ങളായിരുന്നു അവയെന്നും അവര് വിശദീകരിച്ചു. ഡാ കോസ്റ്റയുടെ ഖേദപ്രകടനവും രാജിയും അംഗീകരിച്ചതായി മേയര് സോഹ്റാന് മാംദാനി അറിയിച്ചു.
ഇസ്രായേല് വിരുദ്ധ നിലപാടുകളുടെ പേരില് ജൂതസമൂഹത്തില് നിന്ന് നേരത്തെ തന്നെ എതിര്പ്പ് നേരിടുന്ന മാംദാനിക്ക്, തന്റെ ഉന്നത ഉദ്യോഗസ്ഥയുടെ ഈ പഴയ പരാമര്ശങ്ങള് വലിയ തിരിച്ചടിയായി. ആന്റി-ഡിഫമേഷന് ലീഗ് (ADL) അടക്കമുള്ള സംഘടനകള് ഇതിനെതിരെ ശക്തമായ പ്രതിഷേധം രേഖപ്പെടുത്തി.
നിയമനത്തിന് മുന്പ് ഉദ്യോഗസ്ഥരുടെ പശ്ചാത്തലം പരിശോധിക്കുന്നതിലുണ്ടായ വീഴ്ചയെക്കുറിച്ച് മംദാനി ഭരണകൂടത്തിനെതിരെ വിമര്ശനം ഉയരുന്നുണ്ട്.