ക്ലാസ് മുറിയില് കത്രിക കൊണ്ട് കുത്തേറ്റ വിദ്യാര്ത്ഥി മരിച്ചു; 18 കാരന് പോലീസ് കസ്റ്റഡിയില്
By: 600002 On: Dec 18, 2025, 10:33 AM
പി പി ചെറിയാന്
ബേടൗണ് (ടെക്സസ്): ഹൈസ്കൂള് ക്ലാസ് മുറിക്കുള്ളിലുണ്ടായ തര്ക്കത്തിനിടെ സഹപാഠിയുടെ കുത്തേറ്റ വിദ്യാര്ത്ഥി മരിച്ചു. ബേടൗണിലെ സ്റ്റെര്ലിംഗ് ഹൈസ്കൂളില് ബുധനാഴ്ച രാവിലെയാണ് ഞെട്ടിക്കുന്ന ഈ സംഭവം നടന്നത്.
രാവിലെ 10:42-ഓടെ രണ്ട് ആണ്കുട്ടികള് തമ്മിലുണ്ടായ വഴക്കിനിടെയാണ് സംഭവം. 18 വയസ്സുള്ള വിദ്യാര്ത്ഥി പ്രായപൂര്ത്തിയാകാത്ത സഹപാഠിയെ കത്രിക കൊണ്ട് കുത്തുകയായിരുന്നു.
ഗുരുതരമായി പരിക്കേറ്റ വിദ്യാര്ത്ഥിയെ ഉടന് തന്നെ എയര് ആംബുലന്സ് (Life Flight) വഴി ടെക്സസ് മെഡിക്കല് സെന്ററില് എത്തിച്ചെങ്കിലും ജീവന് രക്ഷിക്കാനായില്ല. കാലാവസ്ഥാ പ്രശ്നങ്ങള് കാരണം സ്കൂളില് വിമാനം ഇറക്കാന് കഴിയാത്തതിനാല് ആദ്യം ആംബുലന്സില് വിമാനത്താവളത്തില് എത്തിച്ച ശേഷമാണ് ആശുപത്രിയിലേക്ക് മാറ്റിയത്.
ആക്രമണം നടത്തിയ 18-കാരനെ പോലീസ് കസ്റ്റഡിയിലെടുത്തു. സംഭവത്തെത്തുടര്ന്ന് സ്കൂളില് താല്ക്കാലികമായി നിയന്ത്രണങ്ങള് (Hold) ഏര്പ്പെടുത്തിയെങ്കിലും പിന്നീട് ഇത് നീക്കി. ക്യാമ്പസില് നിലവില് മറ്റ് സുരക്ഷാ ഭീഷണികള് ഇല്ലെന്ന് അധികൃതര് അറിയിച്ചു.
കുട്ടികളുടെ സ്വകാര്യത മാനിച്ച് ഇവരുടെ പേരുവിവരങ്ങള് സ്കൂള് അധികൃതര് പുറത്തുവിട്ടിട്ടില്ല. സംഭവത്തില് പോലീസ് അന്വേഷണം ഊര്ജിതമാക്കിയിട്ടുണ്ട്.