കാനഡയിലേക്ക് റോബോ ടാക്സികൾ എത്തിക്കാൻ ശ്രമം തുടങ്ങി വെയ്‌മോ

 

 

റോബോ ടാക്സി സാങ്കേതികവിദ്യാ രംഗത്തെ പ്രമുഖരായ വെയ്‌മോ (Waymo) കാനഡയിൽ തങ്ങളുടെ റോബോട്ടാക്സി സേവനം അവതരിപ്പിക്കാൻ ലക്ഷ്യമിടുന്നു. നിലവിൽ യുഎസിലെ തിരഞ്ഞെടുത്ത നഗരങ്ങളിൽ വിജയകരമായി പ്രവർത്തിക്കുന്ന ഈ അമേരിക്കൻ കമ്പനി, കാനഡയിലെ വലിയ നഗരങ്ങളിലേക്ക് സർവീസ് വ്യാപിപ്പിക്കാൻ ഉദ്യോഗസ്ഥരുമായി ചർച്ചകൾ ആരംഭിച്ചു. കാനഡയിലെ നിയമ ചട്ടക്കൂടുകൾ മാറ്റിയെടുക്കാൻ സഹായിക്കുന്നതിനായി കമ്പനി പ്രതിനിധികളെയും ലോബിയിസ്റ്റുകളെയും നിയമിച്ചിട്ടുണ്ട്. ഗൂഗിളിൻ്റെ മാതൃസ്ഥാപനമായ ആൽഫബറ്റിൻ്റെ സബ്സിഡിയറി കമ്പനിയാണ് വെയ്മോ.

ഡ്രൈവർ ആവശ്യമില്ലാത്ത ടാക്സി സേവനം കാനഡയിൽ എത്തിക്കാൻ തങ്ങൾക്ക്   ലക്ഷ്യങ്ങളുണ്ടെന്ന് വെയ്‌മോയുടെ വക്താവ് അറിയിച്ചു. എങ്കിലും, കാനഡയിൽ വെയ്‌മോയുടെ റോബോട്ടാക്സികൾ ഉടൻ ഓടിത്തുടങ്ങാൻ സാധ്യതയില്ല. നിലവിൽ ബ്രിട്ടീഷ് കൊളംബിയ, ഒൻ്റാരിയോ തുടങ്ങിയ പ്രവിശ്യകളിൽ ഡ്രൈവറില്ലാത്ത വാഹനങ്ങൾ പൊതുനിരത്തിൽ ഓടിക്കാൻ നിയമപരമായ വിലക്കുകളുണ്ട്. ട്രാൻസ്പോർട്ട് കാനഡയും പൂർണ്ണമായി ഓട്ടോമേറ്റഡ് വാഹനങ്ങളുടെ പൊതുവായ വിൽപ്പനയും ഇറക്കുമതിയും അനുവദിക്കുന്നില്ല. മഞ്ഞും ഐസുമുൾപ്പടെയുള്ള കാനഡയിലെ വെല്ലുവിളിയുയർത്തുന്ന കാലാവസ്ഥയും ഒരു ഘടകമാണ്. അതിനാൽ, കാനഡയിൽ സർവീസ് തുടങ്ങുന്നതിന് മുമ്പ് വെയ്‌മോയ്ക്ക് പ്രവിശ്യാ തലത്തിലും ഫെഡറൽ തലത്തിലും ഒന്നിലധികം നിയമപരമായ കടമ്പകൾ കടക്കേണ്ടതുണ്ട്.