റഫ്യൂജി സ്റ്റാറ്റസ്  അവകാശപ്പെട്ട് ഭീഷണിപ്പെടുത്തി പണം തട്ടുന്ന കേസിലെ പ്രതികൾ, നാടുകടത്തൽ നടപടികൾ  അനിശ്ചിതത്വത്തിൽ

ബ്രിട്ടീഷ് കൊളംബിയയിൽ ഭീഷണിപ്പെടുത്തി പണം തട്ടുന്ന കേസുകളുമായി ബന്ധപ്പെട്ട് നാടുകടത്തൽ നടപടികൾ നേരിടുന്ന എല്ലാ വിദേശ പ്രതികളും Refugee Status ആവശ്യപ്പെട്ടതോടെ തുടർ നടപടികൾ അനിശ്ചിതത്വത്തിലായി. ബി.സി. എക്സ്റ്റോർഷൻ ടാസ്‌ക് ഫോഴ്‌സ് തിരിച്ചറിഞ്ഞ ഈ വിദേശ പൗരന്മാർക്കെതിരെ കാനഡ ബോർഡർ സർവീസസ് ഏജൻസി (CBSA) അന്വേഷണം ആരംഭിച്ചപ്പോഴാണ് ഇവർ അഭയാർത്ഥി പദവിക്ക് അപേക്ഷിച്ചത്. തൽഫലമായി, ഈ 14 പ്രതികളെ നാടുകടത്താനുള്ള ശ്രമങ്ങൾ താൽക്കാലികമായി നിർത്തിവെച്ചിരിക്കുകയാണ്. ഇവരുടെ അസൈലം  അപേക്ഷകൾക്ക് നിയമപരമായ സാധുതയുണ്ടോ എന്ന് ഇമിഗ്രേഷൻ ആൻഡ് റെഫ്യൂജി ബോർഡ് (IRB) തീരുമാനിക്കുന്നത് വരെ നാടുകടത്തൽ നടക്കില്ലെന്ന് സിബിഎസ്എ (CBSA)  സ്ഥിരീകരിച്ചു.

ഈ നീക്കം നാടുകടത്തൽ നടപടികൾ വർഷങ്ങളോളം വൈകിപ്പിക്കാൻ സാധ്യതയുണ്ടെന്ന് ഇമിഗ്രേഷൻ നിയമ വിദഗ്ദ്ധർ അഭിപ്രായപ്പെടുന്നു. ക്രിമിനൽ പ്രവർത്തനങ്ങളിൽ ഇവർക്ക് പങ്കുണ്ടെങ്കിൽ പോലും, അവരുടെ അഭയാർത്ഥി അപേക്ഷകൾ പരിഗണിക്കാൻ ഐആർബി (IRB) ബാധ്യസ്ഥരാണ്. എന്നിരുന്നാലും, കുറ്റകൃത്യങ്ങളിൽ ഏർപ്പെട്ടതിൻ്റെ പേരിൽ ഇവരെ കാനഡയിൽ പ്രവേശിപ്പിക്കാൻ കഴിയില്ല എന്ന കാരണത്താൽ ഐആർബിക്ക് ഇവരുടെ അപേക്ഷകൾ തള്ളിക്കളയാനും സാധിക്കും. എങ്കിലും ഈ പ്രതികൾ അഭയാർത്ഥി പദവിക്ക് അപേക്ഷിച്ചതോടെ, കാനഡയിലെ നിയമപരമായ നടപടിക്രമങ്ങൾ കാരണം ഇവരുടെ നാടുകടത്തൽ വിഷയത്തിൽ ഒരു തീരുമാനമെടുക്കാൻ കാലതാമസം ഉണ്ടാകുമെന്ന് അധികൃതർ വ്യക്തമാക്കി.